ازاى أتعامل مع جارى المتطفل

الناس انواع فيهم المتطفل والانطوائي والجبان والاجتماعي, والجيران من أهم أسباب تنقل ناس كتير من بيتهم, بس ده حل لو مش حابب بيتك ومش مرتاح فيه انما لو بتحب بيتك ومش عايز تتنقل منه وفيه كل ذكرياتك الحلوه هتتصرف ازاي ؟

دول اكتر من طريقة على سبيل المثال عشان تعرف تتصرف معاه:-

ازاى أتعامل مع جارى المتطفل

مش لازم تدخل نفسك في مشكلة مع جارك عشان تتجنب فضولة يعني لما يبدا هزار معاك عشان يسألك على الضيوف اللي زاروك امبارح او يعرف انت اشتريت اي أو رايح فين أو راجع منين واللي بتسال على بنتك وابنك ومستواهم في المدرسة ,اهرب من السؤال بذكاء من غير ماتقوله انت مالك ولا دي حاجة خاصة ببا ولا أي نوع من الكلام ممكن يسبب لك مشكله تانيه معاك لانك برده هتعيش في نكد

ببساطة جدا اهرب من السؤال بطريقة ذكية ,وهو بعد كده هيفهم لوحده انك مبتحبش تتكلم عن خصوصياتك و هيبطل يسألك زي انك تغير الموضوع أو تفتح تليفونك وتستأذن منه ترد عليه, وفي الحالة دي مش هتكون خسرته وفي نفس الوقت مرة مع التانية هيبطل يسألك حتى لو تطفل من بعيد

اول ماتلاقي الكلام بدأ يدخل في الاسئلة اللي مش من حق حد يسالك عليها زي “ابنك جاب تقدير كام في الكلية أو في المدرسة أو بنتك اتخطبت ولا لا أو بتقبض كام” وكتير من الاسئلة البايخة اللي مابتكونش عايز ترد عليها, وفي نفس الوقت مش عايز تقوله كلام يضايقة ويستحسن طبعا متقولوش كلام يضايقة ، في الحالة دي تقدر تجاوب عليه إجابة عامة ميعرفش منها حاجة وفي نفس الوقت يعرف انه اتدخل في حاجة متخصوش وفي الاغلب مش هيسالك تاني

على سبيل المثال لما يقولك ابنك عمل ايه في الامتحان رد وقوله نجح الحمد لله أو لما بتخرجوا بتروحوا فين قوليها في اي مكان نتفق عليه واحنا خارجين مش مكان معين, ولو اللي بيسال رخم عايزلك تحدد له برده ابدا رد عليه السؤال بسؤال بمعني لو بيقولك بتقبض كام قوله ليه انت عايز سلفة ولا حاجة هيبدا يكون مهزوز تقدر ساعتها تقوله اي رد مش هيعترض عليه زي الحمد لله بقبض كويس لو احتجت حاجة عرفني

يعني لو جارك بدء حوار وانت عارف انه بيبدا الحوار عشان يسألك على حاجة معينة ممكن عادي جدا لو مش عارف تخلع من الإجابة انك تعدى الجزء ده من الكلام كانك مسمعتوش أو ماخدتش بالك ده لو انت هتسيبه من الأساس يفتح حوار معاك

ودي بقي طريقة فيها شوية ذكاء ولعب على النفسية وهي ان لما يكون في كلام مش عاجبك موجه ليك كل اللي عليك انت تعمله انك تشيل اي تعبير من على وشك

يعني لا تبتسم ولا تكشر وتكون في نفس الوقت مركز مع الكلام اللي بيقوله وتكون باصص في عينه وتستمر فى صمتك وتركيزك التام..مبدئيا التكنيك ده بيدى انطباع للشخص المتطفل او السخيف احساس بالحيرة ياترى انت مبسوط أو اضايقت!! ومش هيبقى عارف وقع الكلام عليك ايه فساعتها هو اللى ممكن يغير الكلام لانك بكده تفقده الثقة فى نفسه لانه معرفش ايه اللى دار فى دماغك.

الطريقة دى ابسط تشبيه ليها هو أنك بتعمل وشك مراية للي قدامك فلو بيقول شوية سخافات بتنعكس عليه لانه مش لاقى منك رد فعل وهو مش قادر يحدد احساسك من ناحيته.

حتي لو مش عايز ترد على السؤال وقدرت تهرب من السؤال السخيف بأي رد زكي خلي ردك دايما لطيف مع ابتسامة لطيفة على وشك لان ده هيخلي جارك يحترم انك مش عايز تتكلم في خصوصياتك ومش عايز تحرجه

والطريقة دي هتساعدك اكتر بكتير من المشاكل والخناق انك تعيش جنب جارك في هدوء وراحة بال ولو حتي متطفل وفيه عيوب كتير< فالابتسامة ليها سحر خاص هيخلية يقدرك ويحترمك

يعني متكنش دايما بتسأل عليه وتجر معاه كلام زياده عن اللزوم وتشتكي من تطفله في الأغلب لو انت مش بتتكلم معاه كتير هيكون سؤاله قليل ولو بيتطفل هيتطفل من وراك , ودايما يكون صوتك واطي وتعود أسرتك على كده وتنبهه عليهم ميتكلموش مع حد في خصوصيات لان احيانا الاولاد بدون قصد بتطلع خصوصيات البيت لأولاد الجيران وبالتالي جارك بيعرف كل تفاصيل حياتك من غير مايتعب نفسه

نصائــــح

مش مطلوب منك تعاقب الناس ولا تعدل عليهم سلوكياتهم طالما مطلبش منك النصيحة لكن اللي مطلوب منك تعرف تتعامل مع كل شخصية عشان تتجنب المشاكل
تقدر تاخد خقك وتحمي خصوصياتك ب100 طريقة تانيه غير الخناق والسلوكيات غير الحضارية عشان تعيش في سلام وتسيب غيرك يعيش في سلام