محدش خالي من العيوب ومش مطلوب منك تصلح كل عيوب الناس بطريقة مباشرة مدام مطلبش منك المساعدة وأحيانا بنضطر نتعامل مع عيب معين في شخصية حد وممكن كمان يكون الشخص عزيز علينا واحيانا تانية بيكون مش فارق معانا الشخص بس حابين اننا نساعده في كل الأحوال محتاجين طريقة نتعامل بيها مع الشخص المغرور لانه في الاول وفي الاخر مرض في الشخصية بيعود بالسلب على الشخص نفسه واللي بيتعامل معاه

_في حالة اذا كان مهم وضروري تتعامل معاه وكان شخصية مهمة زي انه يكون مديرك في الشغل أو حد اكبر منك في السن أو في الخبرة المفروض تتعامل معاه بالطرق الآتية عشان توصل للي انت عايزه من الكلام معاه

خطوات ازاى أتعامل مع الشخص المغرور

  • احترم رأيه

الشخص المغرور تقدر تكتسب وده وتتكلم معاه بكل سهوله لو أظهرت احترامك لرأيه وسمعته كويس لان ببساطه هو عايز يوصل لده في الآخر وبغض النظر عن اننا المفروض نحترم راي اي حد في الطبيعي لكن الشخص المغرور بالذات لو عايز تتكلم معاه لازم اول حاجة تبدا بيها هي انك تظهر احترامك لرأيه عن طريق

1-تنصت ليه كويس وهو بيتكلم

2-متقطعوش في الكلام

3-لغة جسدك تدل على الإصغاء الجيد زي انك تعدل نفسك أو تهز راسك دليل على انتباهك ليه

4-لما تبدأ كلامك ابدا عيد الجملة اللي قالها حتى لو هتعارضه لازم تظهر له ده بطريقة غير مباشرة عن طريق انك تبدا بكلامه الاول مثلا تقوله عشان حضرتك بتقول كذا كذا يبقي هنعمل كذا الطريقة دي بتخليه يحس انك محترم رأيه ومهتم بيه وساعتها هيتقبل كلامك بصدر رحب

  • خليك واثق من نفسك

الشخص المغرور اوالواثق في نفسه زيادة عن اللزوم ومبيحبش يضيع وقته مع حد ضعيف أو تافه عشان كده لازم تحضر كلامك كويس قبل ما تتكلم معاه وتكون واثق من كلامك من غير ما تهتز وانت بتتكلم ولا تكون مذبذب

  • متكلموش بصيغة الأمر

لو عايز تعرض عليه أي حاجة متأمروشحاول دايما تبدل صيغة الامر بالاستفهام عشان يحس انكوا متشاركين في الحديث يعني بدل ماتقوله انت المفروض تعمل كذا كذا قوله أي رأيك لو نعمل كذا الطريقة دي بتخليه يحس انه مش مجبر على حاجه وفي الأغلب لو فكرتك كويسه هيوافق عليها بسهولة وهيكون مبسوط وهو بيسمعك لكن لو كلمته بصيغة الأمر هتبقي جيت على كبريائه ومش هيكون عايز يسمعك اصلا وهياخد انطباع سئ عن كلامك قبل ماتقوله

  • إستبدل أنا بـ إحنا

الشخصية المغرورة مبتكنش عايز تحس ان حد احسن منها فانت وانت بتتعامل معاه لازم تاخد بالك من ده كويس جدا وكلمة انا بتحسسه انه مش مهم اوي او انك بتفرض رأيك عليه ،استبدل كلمة انا بااحنا خصوصا لو بتعرض عليه امر حتى لو انت اللى هتعمله أو انت اللي فكرت فيه عشان تقدر توصل للي انت عايز توصله من حديثك معاهاما بقي لو الشخص اللي بتكلمه مغرور بدون داعي وانت مش مضطر للتعامل معاه بس حابب انك تساعده

  • تعامل معاه بنفس الطريقة

التعامل مع المغرور بنفس الغرور بيحسسه باللي بيعمله خصوصا لو مش واخد باله من نفسه ، الشيخ الشعراوي كان بيقول الكبر على أهل الكبر صدقة وده لانك بتاخد فيه ثواب لما تحسسه باللي بيعمله لعل وعسي يكون شخص سوي

  • خليه يحدد كلامه

بمعني ان لو الشخص ده مغرور بدون داعي و دايما بيحب يظهر نفسه بكلام وهو معندوش المعرفة الكافية وبيكون واثق من كلامه ،خليه يحدد كلامه بمعنى أنه لو بيقول معلومة خليه يحددها اكتر أسأله فيها قوله الكلام ده في كتاب آية أو قوله أنا قريت عكس الكلام ده في كتاب كذا أو قوله ادينا أمثلة لكلامك ،انت بكده بتخليه يحس بحجمه الحقيقي ويبطل غرور وكمان ميطولش في الكلام

نصائــــح
-افتكر دايما ان محدش خالي من العيوب وان ممكن تكون انت كمان فيك عيب ومش عارفه وفي ناس بتستحملك وتحاول تتعامل معاك
2-في مفتاح لكل شخصيه بتقدر تتعامل معاها لما بتوصله وتعرف مدخلها منين
– مش مطلوب منك تصلح كل الناس زي مامطلوب منك تعرف تتعامل معاهم ازاي
– حاول تكسب علاقتك بالناس لان لو قطعت علاقتك لكل شخص عشان فيه عيب يبقي مش هتتعامل مع حد