ازاى أتخلص من الكسل

من اكبر الاسباب للاكتئاب والحالة النفسية السيئة هي الملل وعدم الاتزان ده لان وجود هدف واضح وسبب يكون الانسان عايش عشان يحققه بيدي للانسان طاقة وبيقضي علي الملل ودايما بيكون في تغيير في حياة الانسان وبيحس بطعم الراحة لانها بتكون بعد تعب و انجاز حققه

وعشان تتخلص من الكسل اتبع الخطوات التالية:

واحد من اقوى الاسباب اللي بتخلينا نكسل ونسيب اي حاجة ورانا وننام هي كلمة كمان شوية او لما اتفرج علي المسلسل ده او هصلي بس من اول بكرة , كلها أسباب ومبررات عشان نكمل في الراحة اللي بنكون دخلنا فيها ومش قادرين نطلع منها

والحل ان لما يكون وراك حاجة تعملها في نفس الوقت اللي افتكرتها فيه طالما مفيش وراك حاجة تانية ,لو ناوي تصلي يبقي لازم تصلي مع اول اذان يأذن ولو ناوي انك تذاكر يبقي تبدأ تذاكر من اول ما تقرر انك تذاكر ولو نويت تعمل رجيم لازم تبدا فيه علي طول لان من كتر ما هتأجل الخطوة هتزهق ومش هتبدا فيها

وده لأن تأجيل الأعمال وتراكمها بيخلي الانسان يكسل اكتر وميبداش في اي حاجة ويفضل منطقة الراحة عن الارهاق اللي هيحس بيه من الضغط على عقله من كتر الأعمال

ولأن الإنسان لما بيدخل في منطقة الراحة بتاعته ويحصله حالة من الخمول بيبقي صعب عليه انه يخرج منها بسهولة وعشان كده بيبقى لازم يعمل أي حاجة بسيطة تكسر حالة الكسل دي واول ماتبدا هتلاقي نفسك اندمجت في العمل و عايز تكمله للاخر

زي انك تبقي عايز تذاكر ومكسل تبدأ في المادة وحاسس انها تقيلة والحل انك تبدا تقرا المقدمة أو أول صفحة من الكتاب وده هيخليك تكسر حاجز الخوف والكسل وتبدا تشتغل

لما بتكون مجدول أعمالك وعارف كل عمل هيخلص في اد ايه بيديك احساس بالراحة في العمل وطالما هتكون مش حاسس بضغط في الشغل هتقدر تخرج من دائرة الراحة لدائرة العمل بطريقة اسهل

وانك تكون منظم وقتك وعارف الوقت المخصص لراحتك امتي هيخليك مش خايف تطلع من الكسل اللي دخلت فيها لانك عارف ان في وقت للراحة هتستمتع بيه وتراعي انه ميكونش طويل اوي عشان مترجعش لدائرة الكسل تاني

تكبير التفاهات و إعطاء الأعذار الكتير والكلام عن السلبيات سواء كانت اجتماعية أو عائلية من اقوى الاسباب اللي بتتسبب في الكسل ولو عايز تخرج من حالة الكسل يبقى اول حاجة تعملها انك تبطل تقول حجج واعذار زي شخص مش عايز يشتغل فبيكسل ينزل يشوف شغل بحجة انه مش هيشتغل بسبب الواسطة

والحل انك متعتمدش علي السلبيات و تعمل اللي عليك بمعني انك لو عايز تشتغل انزل دور علي شغل ومتاخدش الواسطة حجة للكسل وفي حالة انك ملقتش حاجة تناسبك طور من نفسك لحد ماتلاقي ولو عايز تذاكر متقولش المادة صعبة ومش هلحق من قبل ماتجرب وتعمل اللي عليك

الانسان اللي حاطط هدف عايش عشانه وبيسعي انه يحققة دايما بيكون نشيط ومش عايز يضيع وقته لانه شايف هدفه قدامه ودايما بيشوف هيقدر يحققه ازاي ودايما بيطور من نفسه عشان يحققه

ولو عايز تخرج من حالةالكسل دايما فكر نفسك بهدفك واكتب ليه خطة واضحة لأن في الأغلب لما بيكون عند الإنسان هدف لكن مش راسمله خطة واضحة ولا عارف ليه ملامح بيصاب بحالة إحباط وكسل ومبيحققوش

لما بتتعود تطلب طلبات من اللي حواليك وينفذوهالك بيكون صعب عليك تنفذ طلباتك بنفسك بعد كده والحل انك تتعود انك متطلبش حاجة من حد عشان تكون دايما نشيط ومتكونش شخص اعتمادي

ادعاء المعاناة دايما بيدي احساس زائف بالفشل وبيكون محفز قوي جدا للراحة والخمول وعدم تحقيق الأهداف زي انك تقول انا تعبت كتير في الدراسة واخدت كورسات وعملت حاجات كتير وملقتش شغل

من الطبيعي جدا انك متوصلش لهدفك من اول محاولة او التانية او التالتة واوقات كتير جدا بيكون سبب انك تطور نفسك اكتر وتلاقي فرصة احسن وده الفرق بين الشخص اللي بينجح والشخص اللي بيفشل ان في شخص بيستسلم مع اول مشكلة وشخص بيحط هدف قدامه ومبيكسلش وبيشتغل عليه

والدليل علي كده انك مابتلاقي ناس اشتغلت بدون مجهود بتلاقي ناس كتير نجحت بمجهودها الذاتي وحققت نفسها

نصائــــح
الكسل والفراغ واحد من أهم أسباب المعاصي والأخلاق السيئة عشان كده لو ملكش هدف لازم تبدا وتدور علي هدفك وتحط خطة واضحة عشان تحققه
الراحة من أجل الراحة متعبة جدا وبتسبب الملل والاكتئاب ومش هتحس بطعم الراحة غير بعد التعب وهتستمتع بيها وخليك فاكر ان سبب الراحة هو عشان تقدر تكمل عمل مش عشان ترتاح وبس