النهاردة معانا طبق من المطبخ الإيطالي المعروف بإنه ملك المطابخ في العالم ، و خصوصاً في أطباق المكرونة ، وعلشان راحتك بنختارلك أسهل وصفات و كمان ألذها ، طبق النهاردة هيجمع الأسرة كلها في ثانية من جمال شكل الطبق و ريحته الحلوة ، تعالوا مع بعض نشوف طريقة مكرونة أسباجتي و فراخ بصوص الثوم و الزبدة في 30 دقيقة بس ، و بنوعدك إنك مش هتحتاجي تسافري إيطاليا علشان تاكلي هناك .

2 قطعة فراخ بانيه ، 2 معلقة كبيرة زبدة ، معلقة كبيرة زيت ، 2 معلقة صغيرة ثوم مبشور ، معلقة كبيرة سكر بني ، معلقة صغيرة ملح ، معلقة صغيرة فلفل إسود

½ كيلو مكرونة أسباجتي ، 3 معالق كبيرة زبدة ، 2 معلقة صغيرة ثوم مبشور ، معلقة صغيرة ملح ، معلقة صغيرة فلفل إسود ، فنجان جبنة بارميزان .

إغسلي الفراخ كويس جداً بالدقيق و اشطفيها ، و بعدين تبليها بالملح و الفلفل الإسود و حطيها قي صينية فرن مدهونة بالزيت .

في طاسة صغيرة سخني ( 2 معلقة كبيرة زبدة و معلقة كبيرة زيت و 2 معلقة صغيرة ثوم مبشور) لمدة ثواني ، و بعدين ضيفي معلقة سكر بني عليها .

صبي الصوص علي الفراخ في الصينية و حطيها في الفرن في درجة حرارة متوسطة من 20 ل 25 دقيقة لحد ما الصوص يتشرب .

دلوقتي هنسلق المكرونة في ميه و ملح و نصفيها كويس و نشطفها غلشان متتكسرش مننا .

في طاسة سخني 3 معالق زبدة و 2 معلقة صغيرة ثوم مبشور و معلقة صغيرة ملح و معلقة صغيرة فلفل إسود ، و ضيفي المكرونة المسلوقة و قلبي كويس .

دلوقتي عندنا المكرونة الأسباجتي و عليها صوص الثوم و الزبدة ، و كمان طلعنا الفراخ من الفرن ، هنجهز طبق تقديم و نحط فيه المكرونة و عليها الفراخ ، و نزوق الطبق بالجبنة البارميزان ، و نتمتع بأحلي طبق مكرونة أسباجتي و فراخ بصوص الثوم و الزبدة . ممكن تفدمي الطبق لوحده لإنه فيه كل العناصر اللي بيحتاجها الجسم أو لو حبيتي ، ممكن تقدمي معاه بطاطس شيبسي أو سلطة . و بالهنا و الشفا .

علشان الوصفة تكون ناجحة ، خلي بالك و إنتي بتقلبي الثوم في الزبدة ميغيرش لونه ، و إلا هيتغير طعمه و يمرر.
ممكن تستبدلي الجبنة البارميزان بالجبنة الشيدر المبشورة للتوفير في التكاليف .
لو تحبي تستبدلي الفراخ الفيليه بقطع الصدور أو الدبابيس ، هتاخد في الفرن فترة أطول .