الشوكولاتة و الموز من أكتر الحاجات اللي بتليق على بعض . تخيلي طعم توست النوتيلا بالموز أو ال “بنانا سبليت” المحشية بالشوكولاتة و غيرهم و غيرهم كتير . وصفة النهارده حلاوتها مش هتقل عن حلاوة عن اللي قولناه ده لأن مكوناتها الأساسية هيا الشوكولاتة و الموز . الجميل كمان اننا خلاص بدأنا موسم الموز الجميل ، و ده الموسم اللي ممكن تجيبي فيه الموز البلدي المسكر بسعر كويس جداً ( عكس الموز المستورد في الصيف ) . وصفة النهارده هي مافنز الشوكولاتة بالموز . يلا بينا نشوف المكونات و نبدأ نعمل المافنز مع بعض .

  • جهزي المقادير

كوباية دقيق ، معلقة كبيرة نشا ذرة ، نص معلقة صغيرة بكينج صودا ، ربع معلقة صغيرة ملح ، نص كوباية رقائق شوكولاتة ، 4 معالق كبيرة كاكاو بودرة ، بيضة كبيرة ، نص كوب زبادي ، ربع كوباية زيت جوز هند ، معلقة صغيرة فانيلا ، نص كوباية سكر بني ، 2 أو 3 ثمرة موز كبيرة

  • سخني الفرن

قبل ما تبدأي في الخبز ، سخني الفرن لإن ده هو سر المخبوزات الناجحة

  • إدهني صينية المافنز

إدهني صينية المافنز بالزيت علشان المافنز متلزقش و بعد كده رشي الصينية بالكاكاو (الكاكاو هنا بدل الدقيق اللي برشه في الصينية و أنا بعمل المخبوزات )

  • ضيفي المكونات الجافة

شيلي معلقة دقيق على جنب من كوباية الدقيق . في طبق صغير ، ضيفي باقي الدقيق ، النشا ، الباكينج صودا ، الملح ، الكاكاو و رقائق الشوكولاتة و قلبي المكونات كويس من بعض .

  • جهزي الموز

قشري الموز و إهرسيه كويس جداً .

  • ضيفي المكونات السايلة

في طبق منفصل ، ضيفي البيض ، الزبادي، زيت جوز الهند ، الفانيلا ، السكر البني ، و الموز اللي هرستيه .

  • إخلطي المكونات الجافة مع السايلة

إخلطي المكونات الجافة مع السايلة لحد لما الخليط يبقي متجانس .

  • وزعي الخليط

قسمي الخليط ووزعيه بالتساوي في صينية المافنز .

  • سوي المافنز

إخبزي المافنز من 18 ل 23 دقيقة أو لحد لما تختبري السوي بوضع خلة في المافنز و تطلع نظيفة . لما المافنز تستوي سيبيها تبرد و بعد كده استخدمي سكينة السفرة و خرجي المافنز من الصينية . دلوقتي تقدري تستمتعي بأحلي مافنز الشوكولاتة بالموز اللي ممكن تدوقيها .

  • نصائــــح

ننصحك متستخدميش ورق الكاب كيك في الوصفة دي علشان هتلزق معاكي .
أحسن موز تستخدميه للوصفه دي هو الموز البلدي المستوي أبو قشر إسود .
ممكن تخزني المافنز في التلاجة لمدة 3 أيام و تسخنيها في الميكرويف لمده 15 ل 20 ثانية لما تكوني مستعدة تاكليها و تستمتعي بيها .
لو حبيتي ، ممكن تفردي زبدة فول سوداني أو نوتيلا على الوش .