الستيك من أجمل الأطباق علي السفرة ، و ممكن يتعمل بطرق كتير جدا ، منها الستيك بصوص المشروم ، صوص الطحينة ، الزبدة ، الصويا صوص و صوصات تانية كتير ، النهاردة هنعمل لحم الستيك الملفوف بصوص الخل البلسمي ، طريقة جديدة و طعم مختلف و بالتأكيد طريقة سهلة جدا و مش هتاخد منك أكتر من 30 دقيقة ، يلا مع بعض نبدأ الخطوات .

  • جهزي المقادير

4 قطع من لحم الستيك ، معلقة صغيرة ملح ، معلقة صغيرة فلفل إسود ، 1 فلفل أخضر مقطع شرايح رفيعة ، 1 فلفل أحمرمقطع شرايح رفيعة ، 1 فلفل أصفر مقطع شرايح رفيعة ، 1 كوسة مقطعة شرايح رفيعة ، 2 معلقة زيت زيتون .

  • جهزي مقادير الصوص

معلقة صغيرة زيت زيتون ، فص ثوم مقطع ، ¼ فنجان خل بلسمي ، 2 معلقة صغيرة سكر بني ، 2 فرع روزماري ، ¼ فنجان شوربة لحم .

  •  جهزي شرايح الستيك

إغسلي شرايح الستيك كويس و إفردي كل شريحة و رشي عليها ملح و فلفل إسود و روز ماري .

  • جهزي الخضار

حطي معلقة زيت زيتون في طاسة و قلبي الخضار فيها لمدة 5 دقايق علي نار هادية .

  • رصي الخضار في لحم الستيك

بعد ما فردنا شرايح لحم الستيك و تبلناها في الخطوة2 و جهزنا الخضار في الخطوة 3

نحط الخضار في شريحة لحم الستيك و نخلي طرف الخضار ظاهر من الطرفين ، و نلف شريحة لحم الستيك كويس و نثبتها بخلة ، و نكرر ده مع كل الشرايح .

  • جهزي الصوص

علي نار متوسطة الحرارة حطي معلقة صغيرة زيت زيتون و ضيفي فص الثوم المقطع و قلبي لحد ما يحمر ، بعد كده ضيفي ¼ فنجان خل بلسمي و 2 معلقة سكر بني و الروزماري ، لما يغلي الخليط هدي النار عليه ، و ضيفي الشوربة و سيبيه علي النار لمدة 20 دقيقة .

  • إشوي لحم الستيك

علي شواية مدهونة بمعلقة زيت زيتون حطي شرايح الستيك الملفوف و قلبي علي كل ناحية لمدة 5 دقايق لحد ما يستوي كويس .

  • قدمي و استمتعي

بعد ما تستوي شرايح لحم الستيك كويس حطيه في طبق التقديم و صبي عليه الصوص اللي جهزناه في الخطوة 5 ، و استمتعي بطبق لحم الستيك الملفوف بصوص الخل البلسمي .

  • نصائــــح

الكمية تكفي فردين ممكن تزودي أو تقللي المقادير حسب عدد الأفراد .
ممكن تغيري في نوع الخضار حسب رغبتك ، ممكن تضيفي المشروم أو الفاصوليا الخضراء أو الجزر ، أو أي حاجة تانية .
لو معندكيش شواية ممكن تسوي شرايح اللحم علي طاسة فيها معلقة زيت علي النار و متحرميش نفسك من إنك تتمتعي بلحم الستيك الملفوف بصوص البلسمي .