الكافيين جزء من حياتنا كلنا تقريباً ، منا اللي بيحب القهوة بمشتقتها و منا اللي بيحب الشاي . وصفة النهاردة للي بيحبوا القهوة و خصوصاً الكابتشينو. لو إنتي من عشاق الكابتشينو و متعودة تشربيه دايما ، إيه رأيك تجربيه معانا النهاردة بطريقة جديدة و مختلفة ، في شكل كيك ، كيك الكابتشينو المثلج ، و طبعاً ميمنعش تشربي معاه كابتشينو . أحلي حاجة في الكيك دي إنها سهلة و سريعة ، مش هتحتاج بيكنج بودر ولا فرن ولا مضرب. ده طبعاً غير طعم الكابتشينو بطعمه و لونه الرائع . لو إنتي من عشاق الشاي أكيد هنقدملك وصفات لكيك و بسكويت الشاي في المرات الجاية . دلوقتي يلا مع بعض نعمل كيك الكابتشينو المثلج في 10 دقايق بس و في خطوات مفيش أسهل منها .

  • حضري مقادير كيك الكابتشينو المثلج

4 باكو بسكويت سادة ، 3 معالق كبيرة كابتشينو ميكس ، 5 معالق كبيرة كابتشينو ميكس، 2 معلقة كبيرة لبن ، 2 فنجان كريمة مخفوقة ، 2 معلقة صغيرة فانيلا ، 4 معالق كبيرة سكر بني ، 2 فنجان زبادي ، ¼ فنجان لبن ( دافي )

  • إخلطي الكابتشينو و اللبن

في طبق صغير إخلطي 3 معالق كابتشينو مع 2 معلقة لبن .

  • جهزي الحشو

في طبق كبير إضربي الكريمة المخفوقة، و ضيفي ليها خليط الكابتشينو باللبن اللي جهزتيه في الخطوة اللي فاتت ، و كمان ضيفي السكر البني و الزبادي و الفانيلا .

  • حضري صوص البسكويت

دلوقتي إضربي 5 معالق كابتشينو ميكس الباقيين مع ربع فنجان لبن دافي ، و حطي كل قطعة بسكويت في الخليط و شيليها بسرعة قبل ما تبوش .

  • رصي القالب

عندنا دلوقتي البسكويت اللي بلتيه بالكابتشينو و اللبن و كمان الحشو ، يعني ممكن نبدأ تجهيز القالب و نرصه علشان يبقي عندنا كيك الكابتشينو المثلج ، نحط أول طبقة بسكويت في القالب و نحط عليها طبقة من الحشو ، و بعدين طبقة بسكويت تانية و عليها طبقة حشو تانية ، و ممكن نحط طبقة بسكويت تالتة و عليها حشو كمان ..

  • زوقي القالب

القالب كده إترص و جيه وقت التزويق ، رشي علي السطح كابتشينو بطريقة فنية ، و ممكن تحطي عليها أي فواكه ، سبرنكلز ، إم أند إم أو شوكولاته مبشورة ، و سبيها في الثلاجة ساعتين و قطعيها قبل التقديم .

  • نصائــــح

متخليش البسكويت يبوش علشان هيدي نتيجة مش حلوة
حطي كيك الكابتشينو المثلج في الثلاجة عدة ساعات علشان النتيجة تكون أفضل
قدمي الكيك في الحفلات و أعياد الميلاد و بكده هتكوني متميزة بطريقة كيك جديدة .
ممكن تاكلي كيك الكابتشينو على الفطار الصبح مع كوباية الكابتشينو أو النسكافية المعتادة بتاعتك.