الكوكيز من الحلويات اللي بيحبها الكبار و الصغيرين ، و دي حاجة جميلة. الأجمل إن الكوكيز مش بتاخد في تحضيرها أكتر من 20 دقيقة ، يعني لو عايزين حاجة حلوة في وقت قصير ننصحك بالكوكيز. الكوكيز ممكن تتحشي بحاجات كتير زي رقائق الشوكولاته ، الأوريو ، الكراميل ، أو المكسرات. النهارده هننقدمهالك بالإم اند إمز وده اللي هيديها طعمها المختلف و الوانها الجميلة اللي هتعجب عيلتك أكيد. ممكن تستخدمي الكوكيز كسناك في نص اليوم ، سناك لأولادك في المدرسة ، أو كفطار مع الشاي بلبن. ممكن كمان تقدميها لضيوفك أو كهدية من صنع إيدك لما تزوري حد. الحلو في الكوكيز كمان إنك ممكن تعملي كمية مره واحدة و تخزنيها فتره.

كوباية زبدة ، كوباية سكر ، تلات اربع كوباية سكر بني ، بيضتين ، معلقتين صغيرين مستخرج فانيلا ، كوباية و تلات اربع دقيق ، معلقة ملح صغيرة ، معلقتين ضغيرين بيكنج صودا ، كوباية و ربع مسحوق كاكاو ، كوباية إم اند إمز ، كوباية رقائق شوكولاته.

إضربي الزبدة بالمكسر كويس لحد لما تبقي كريمي و خفيفة . بعد كده هتضيفي عليها السكر الأبيض وكمان السكر البني و إضربي تاني لحد لما الزبدة و السكر يخطلتوا كويس و يكونوا قوام واحد. دلوقتي جه وقت البيض و بعد كده الفانيلا. بعد ما تضيفي كل المكونات دي، اضربي كويس جداً لحد ما توصلي لقوام مناسب و كل المكونات تتخلط كويس

في طبق غويط إخلطي المكونات الناشفة زي الدقيق، الملح ، الباكينج صودا ، و الكاكاو.

إخلطي المكونات السايلة ( من الخطوة 2) مع المكونات الناشفة ( من الخطوة 3) بالتدريج و إضربي كويس جداً. دلوقتي جه الوقت تضيفي أهم مكون و اللي بيميز وصفة النهارده و هو الإم اند إمز و ده اللي بيدي للكوكيز الطعم الحلو و اللون المميز و كمان ضيفي هنا رقائق الشكولاته. ممكن تكتفي بالام اند امز لو حبيتي.

سخني الفرن على 350 قبل دخول الكوكيز عشان تستوي كويس. استخدمي معلقة أو مغرفة ايس كريم علشان تشكلي العجينة على شكل كوكيز مدورة. رصي الكوكيز في صينية و دخليها الفرن لمده 10 من ل 12 دقيقة. خرجي الكوكيزمن الفرن و قدميها لعيلتك سخنة أو ساقعة مع اللين .

الكمية دي من المكونات تعمل حوالي 24 كوكي. ممكن تتحكمي في المقادير لو عايزه اكتر أو أقل.
زودي الإم اند إمز في العجية لألوان اكتر و شكل نهائي اجمل
متنسيش تسخني الفرن على 350 قبل ما تدخلي العجين
لو حبيتي ، ممكن تضاعفي كمية عجينة الكوكيز و تحتفظي بيها في الفريزر و تستخدميها بعدين وده هيوفرلك وقت كبيرو خصوصاً إن أولادك هيطلبوها منك كتير