الأكل مبيحلاش غير بعد نص الليل ، مش كده ؟ لما الساعة تيجي 12 و انتي سهرانة بتحسي بجوع الإسبوع كلة في لحظة واحدة . و طبعاً علشان إحنا مش في عالم مثالي ، التلاجة دايماً هتكون فاضية . بس الحلو في وصفة النهارده إن حتي لو تلاجتك فاضية ، أكيد مكونات السلطة دي هتكون موجودة عندك ( حتي لو الساعة 12 بليل ) . وصفة النهارده هي الكريمي باستا سالاد بالخيار و اللي ممكن تعمليها في 20دقيقة و تاكلي و تنامي مبسوطة كمان. يلا بينا نشوف المكونات و الطريقة مع بعض و إفتكري إنك ممكن دايماً تنامي قبل الساعة 12 و تعملي الباستا على الغدا تاني يوم أحسن .

  • جهزي مكونات الباستا

خيارتين متوسطين أو واحدة كبيرة ، كيس مكرونة بالشكل اللي تحبيه و يفضل حاجة حجمها متوسط زي المكرونة القلم ، و بصلة

  •  جهزي مكونات الصوص

نص كوباية كريمة طبخ ، نص كوباية مايونيز، معلقة صغيرة سكر ، نص معلقة صغيرة ملح ، معلقتين كبار شبت أو بقدونس ، معلقتين كبار خل ، فلفل إسود للتتبيل .

  • إعمل الصوص

ضيفي كل مكونات صوص الباستا ( اللي إتكلمنا عنهم فوق ) في طبق كبير ، إضربيهم كويس ، و سيبيهم على جنب .

  • إسلقي المكرونة

إسلقي المكرونة بالطريقة المعتادة اللي كلنا عارفنها ، اشطفيها بميه باردة و صفيها كويس . و علشان المكرونة متتكسرش أو تعجن منك و تبوظ شكل الطبق ، ضيفي ملح و شوية زيت أثناء غلي الميه ..

  • قطعي البصل

قطعي البصل حلقات رفيعة و سيبيه على جنب

  • قطعي الخيار

قطعي الخيار بشكل شرايح صفيرة ( نص دايرة زي الصورة )

  • جهزي السلطة

ضيفي كل مكونات الكريمي باستا سالاد بالخيار من الخطوات اللي فاتت في طبق واحد ، قلبي المكونات كويس مع بعض ، و سيبي الخليط لمده 40 دقيقة في التلاجة قبل التقديم ( ده علشان تكون النتيجة أحسن ، لكن لو مستعجلة ممكن تاكليها قبل كده). بعد ال 40 دقيقة ، طلعي الباستا من التلاجة و زينيها بالشبت أو البقدونس و بالهنا و الشفا.

  • نصائــــح

بعد تقطيع البصل ، سيبيه لمدة 10 دقايق في طبق مليان ميه ساقعة و ده هيقلل كتير من حدة طعم البصل اللي كلنا عارفنها ، وده طبعاً لو طعم البصل بيضايقك.
لو فيه مكون من المكونات مش موجود عندك زي الكريمة أو المايونيز ممكن تستغني عنها ، متقلقيش ، هتستمتعي بطعم الباستا برضوا . ودي أحلي حاجة في الوصفة .
ممكن تاكلي كريمي باستا سالاد بالخيار لوحدها كسناك ، أو تقدميها مع بطاطس علي العشاء أو تقطعي عليها فراخ للغذاء علشان تكون وجبة غذائية متكاملة .
طبق الكريمي باستا سالاد بالخيار طبق مثالي مع كل أنواع اللحوم و الأسماك و الفراخ ، ممكن يتقدم مع الطبق الرئيسي و بس و مش هتحتاجي طبق تاني جنبه .