إزاي تعملي كب كيك كوكي مونستر

شخصية "الكوكي مونستر" شخصية كارتونية غنية عن التعريف عند الأطفال و الكبار من البرنامج العالمي "عالم سمسم". اتسمي الكوكي مونستر بالإسم ده من كتر حبه للكوكيز (ومين مبيحبهاش؟). لو بتحاولي تتعلمي عمايل الحلويات عشان تثبتي نفسك لعيلتك ،  تسعدي اولادك ، أو تقدميها كهدية في أي مناسبة أو عيد ميلاد كب كيك الكوكي مونستر هيا الحل. بمجهود قليل و مكونات بسيطة هيكون عندك حاجة مفيش إتنين يختلفوا على حلاوتها. يلا بينا دلوقتي نشوف المكونات و الخطوات.


6 صوت بنسبة 66.7%
3 شخص قاموا بالتجربة

الخطوة رقم 1

جهزي المكونات

خلينا نشوف المكونات مع بعض:

بسكويت اوريو ، ميكس كب كيك فانيلا جاهز ،4 معالق زبدة  ،3/4  كوباية سكر بني ، 5 كوبايات سكر مطحون ، 2 معلقة صغيرة فانيلا ، كوباية كريمة خفق ، نص كوباية رقائق شوكولاته ، اوريو مطحون ، ألوان طعام صحية أزرق، حلويات جاهزة على شكل عيون ، ميني كوكيز مقسومة بالنص.


الخطوة رقم 2

إعملي الكب كيك

افرشي صينية الكب كيك بورق الكب كيك الملون واللي هتلاقيه موجود في كل محلات الحلويات أو السوبر ماركت الكبيرة. بعد كده هتحطي واحدة بسكوت اوريو في كل ورقة من الورق كفرشة للعجينة. دلوقتي ممكن تجهزي عجينة الكب كيك حسب الطريقة المكتوبة على العلبة أو لو تحبي ممكن تعمليها من الأول بنفسك. و لما العجينة تجهز ، صبيها في أوراق الكب كيك بس أهم حاجة متمليهاش على الأخر علشان يكون فيه مكان تنفش. دخلي الخليط الفرن اللي لازم يكون سخن من قبلها على درجة حرارة 350. سيبي الكب كيك في الفرن لمده ربع ساعة. طلعيه من الفرن و سيبيه لحد لما يبرد.


الخطوة رقم 3

حضري الحشو

إضربي معلقتين زبدة ،3/4 كوباية سكر بني ، و كوباية سكر مطحون مع بعض على سرعة متوسطة لحد لما القوام يبقي ناعم جداً. ضيفي معلقة فانيلا صغيرة و 3 معالق صغيرة كريمة خفق و اضربي الخليط لمده دقيقة علي سرعة عالية. دلوقتي ضيفي رقائق الشوكولاته للخليط

الخطوة رقم 4

إحشي الكب كيك

ستخدمي سكينة صغيرة و إعملي بيها فاتحة على شكل دايرة في نص كل كب كيك. إملي كل كب كيك بالحشو اللي جهزتيه في الخطوة رقم 3.

الخطوة رقم 5

إعملي الفروستنج

إضربي معلقتين زبدة ، ربع كوباية كريم خفق ، و معلقة فانيلا صغيرة على سرعة متوسطة لحد لما القوام يبقي ناعم جداً. ضيفي 4 كوبايات سكر مطحون على مراحل. بعد لما تضيفي السكر زودي سرعة المضرب شوية و اضربي لمده دقيقتين. جيبي الاوريو المكسر و حطيه مع الخليط و بعدين ضيفي اللون الأزرق بالكمية اللي تحبيها لحد لما توصلي لدرجة اللون اللي انتي عايزاه .

الخطوة رقم 6

زيني و قدمي

ضيفي الفروستنج في مكنة التزيين و غطي الكب كيك بيه. ضيفي العيون الجاهزة أو إبدعي و إعمليها بأي حاجة متوفرة زي عجينة السكر. و علشان الشكل النهائي، ضيفي نص الميني كوكيز عند البق عشان تدي شكل الكوكي مونستر اللي كلنا متعودين عليه.

نصائــــح

  • سر نجاح الكب كيك هو – زي كتير من المخبوزات - انك تسخني الفرن قبل دخول العجينة، لازم درجة الحرارة تكون 350