الشتاء بيدق خلاص على الأبواب ، و البطاطا هتكون ضيفة كل بيت علشان تملا الدنيا بالدفا ، و طبعا هنحطها علي النار نسلقها أو في الفرن نشويها و لما نحب نغير هنعملها صينية بالمكسرات ، طيب سمعتي عن كب كيك البطاطا بالفروستنج ،طريقة جديدة تقدمي بيها البطاطا و تبهري بيها أسرتك ، بمقادير بسيطة و خطوات سهلة هيكون عندك كب كيك البطاطا بالفروستنج ، يلا بينا نبدأ الشغل .

  • جهزي مقادير الكب كيك

فنجان دقيق ، ثمرة بطاطا ، ½ معلقة قرفة ، معلقة بيكنج بودر ، ¼ بيكنج صودا ، ¼ معلقة ملح ،1 1/4 ، ¾ فنجان سكر ، 6 معالق كبيرة زبدة ، 3/1 فنجان لبن ، بيضة ، 2 معلقة صغيرة فانيلا .

  •  جهزي مقادير الفروستنج

8 معالق كبيرة زبدة ، فنجان جبنة كريمي ، 2 معلقة صغيرة فانيلا ، ¼ معلقة صغيرة قرفة ، 3 فنجان سكر بودرة .

  • جهزي البطاطا

إسلقي البطاطا في الميه و صفيها و بعد كده قشريها و إهرسيها كويس قوي .

  • إخلطي مكونات الكب كيك السايلة

في طبق كبير إضربي 6 معالق زبدة و ¾ فنجان سكر لمدة 3 دقايق و بعدين ضيفي بيضة و ثمرة البطاطا المهروسة و 3/1 فنجان لبن و 2 معلقة فانيلا و إخلطي كويس لحد ما تختلط جميع المكونات مع بعض .

  • إخلطي مكونات الكب كيك الجافة

في طبق تاني إخلطي الدقيق و البيكنج بودر و البيكنج صودا لحد ما يمتزجوا كلهم ببعض .

  • إخلطي المكونات كلها

ضيفي المكونات السايلة للمكونات الجافة و قلبي كويس قوي .

  • جهزي صينية الخبز

حضري صينية الكب كيك و حطي فيها ورق الخبز و قسمي الخليط اللي جهزتيه في الخطوة اللي فاتت علي فتحات الكب كيك .

  • دخلي الفرن

في فرن متوسط الحرارة إخبزي صينية كب كيك البطاطا لمدة من 20 دقيقة تقريبا لحد ما تتحول الكب كيك للون الذهبي .

  • حضري الفروستنج

و الكب كيك في الفرن إبدأي جهزي الفروستنج ،إضربي 8 معالق كبيرة زبدة و فنجان جبنة كريمي و 2 معلقة صغيرة فانيلا و 3 فنجان سكر بودرة و ¼ معلقة صغيرة فانيلا لحد ما كل المكونات تختلط ببعض .

  • زوقي و استمتعي

بعد ما الكب كيك تخرج من الفرن و تبرد زوقيها بالفروستنج و قدميها و استمتعي بأحلي كب كيك بطاطا بالفروستنج .

  • نصائــــح

زي أي مخبوزات سخني الفرن كويس قبل ما تحطي الصينية .
إختبري الكب كيك في الفرن بخلة علشان تختبري السوي .
ممكن تعملي الفروستنج من الكريم جانتيه و تقطعي فواكه مكعبات صغيرة و تزوقي بيها الكب كيك و اتمتعي بكب كيك البطاطا بالفروستنج .