كلها أيام و الصيف يخلص ، لو إنتي من الناس اللي بتفضل الصيف عن الجو البارد و مش عيزاه يخلص أبدا يبقي لازم تستغلي أخر أيامه صح. و طبعاً لما بنقولك تستغليه صح نقصد في الأكل (طبعااااً). و مفيش حاجة بتقول (صيف) زي الآيس كريم و الكب كيك. إحنا بقي قررنا نقدملكم وصفة بتجمع بين الإتنين، الكب كيك و الآيس كريم . ممكن تعملي الوصفة دي في حوالي 20 دقيقة بس.و تقدميها لعيلتك أو ضيوفك في آخر أيام الصيف . ممكن كمان تعمليها في حفلات أعياد الميلاد و هتكون فكرة جديدة و مبتكرة و كمان شكلها حلو . دلوقتي هنبدأ مع بعض خطوات عمايل كب كيك الآيس كريم .

  • جهزي المقادير: مقادير الكب كيك

كوباية و نص دقيق ، ربع كوباية زبدة ، نص كوباية لبن ، نص كوباية سكر ، معلقة صغيرة بيكنج بودر ، معلقة صغيرة فانيليا ، 2 بيضة ، ذرة ملح .

  • بقية المقادير

6 قطع من بسكويت الآيس كريم ( ممكن تشتريه فريش من أي محل أيس كريم ) ، مارشيملو ، كريز ، سبرنكل ، ربع كوباية زبدة ، نص كوباية سكر بودرة ، معلقة صغيرة لبن ، معلقة صغيرة فانيلا .

  • إعملي الكب كيك

إعملي الكب كيك بالطريقة المعتادة ، إضربي البيض بالمضرب الكهربائي أو اليدوي ، ضيفي الفانيلا ، السكر ، و استمري في الضرب ، ضيفي بعد كده الدقيق حبة حبة مع البيكنج بودر و الملح ، و ضيفي اللبن كل شوية و إنتي بتضربي .

  • صبي الخليط

دلوقتي وصلنا للخطوة اللي هتفرق في التقديم ، صبي خليط الكب كيك في بسكويت الآيس كريم ، و حطي البسكوت بالخليط في صينية الكب كيك .

  • إخبزي الكب كيك

حطي صينية الكب كيك في فرن سخن و هتاخد وقت من 20 ل 25 دقيقة تقريبا

  • سيبي الكب كيك يبرد

بعد ما تتأكدي إن الكب كيك إستوي خرجيه من الفرن ، و سيبيه يبرد تماما علشان تعرفي تكملي الخطوات .

  • إعملي الفروستنج

إضربي ربع كوباية زبدة مع معلقة فانيلا بالمضرب، و ضيفي السكر البودرة بالتدريج و اللبن مع الضرب ، لحد ما توصلي للقوام اللي إنتي عاوزاه .

  • ضيفي الفروستنج

حطي الفروستنج علي الكب كيك يعد ما برد ، و بكده هيديكي شكل الآيس كريم .

  • زوقي و استمتعي

دلوقتي ممكن تزوقي الكب كيك بالمارشيملو ، الكريز ، السبرينكلز أو أي حاجة متوفرة، و استمتعي بكب كيك علي شكل الآيس كريم .

  • نصائــــح

علشان الكيك تنجح لازم يكون الفرن سخن قبل ما تحطي الصينية فيه .
إختبري سوي الكيك بإنك تحطي خلة فيها و لو طلعت نظيفة تعرفي إن الكب كيك إستوت .
ممكن تستغني عن المارشيملو و السبرنكلز و الكريز و تستبدليهم بالمكسرات أو السوداني المطحون و قطع الفاكهة و إم أند إم ، زي ما تحبي