خلاص كلها أيام و ندخل في فصل الخريف . الخريف فصل من فصول السنة اللي محدش بيختلف على جمالها . و مين ميحبش الجو الجميل ، اللي مش برد ولا حر ؟ لو انتي من محبي الخريف يبقي أكيد عارفة إن زي ما الصيف معناه بطيخ و مانجو ، و الشتا معناه برتقال و يوسفي ، إن الخريف هو القرع العسلي و بس . وصفة النهارده للناس اللي بتحبه.و لو مجربتهوش قبل كده لازم تجربيه ، إيه رأيك تكون تجربتك الأولي معانا في طبق كاب كيك القرع العسلي بالكريمة. يلا بينا نشوف المكونات و نبدأ مع التنفيذ اللي هياخد منك حوالي 50 دقيقة .

  • جهزي مقادير كاب كيك القرع العسلي

1 و نص كوباية دقيق ، معلقة صغيرة باكينج بودر ، ربع معلقة باكينج صودا ، معلقة صغيرة قرفة ، معلقة صغيرة زنجبيل ، ربع معلقة صغيرة جوزة الطيب ، نص معلقة صغيرة قرنفل ، نص معلقة صغيرة ملح ، كوباية بيوريه قرع عسلي ، نص كوباية زيت نباتي ، نص كوباية سكر بني ، ربع كوباية سكر ، 2 بيضة كبيرة ، و معلقة صغيرة فانيلا .

  • جهزي مقادير الفروستنج

كيس كريمة جانتيه ، فنجان لبن ، نص كوباية زبدة ، 2 كوباية سكر بودرة ، و معلقة صغير فانيلا .

  • إعملي الكاب كيك

دلوقتي هنبدأ مع بعض نعمل الكاب كيك

  • إضربي المكونات الناشفة

في طبق كبير إضربي كل المكونات الناشفة ( الدقيق ، الباكيج بودر ، الباكينج صودا ، القرفة ، الزنجبيل ، جوزة الطيب ، القرنفل ، و الملح ) و سيبي الخليط على جنب .

  • إضربي المكونات السايلة

في طبق منفصل ، إضربي المكونات السايلة ( بيوريه القرع العسلي ، الزيت ، السكر البني ، السكر الأبيض ، البيض ، و الفانيلا ) لحد ما يختلطوا كويس جداً .

  • إخلطي الناشف و السايل

إخلي المكونات الناشفة و المكونات السايلة و إضربيهم كويس جداً لحد ما القوام يتجانس .

  • ضيفي الخليط للصينية

ضيفي الخليط للصينية المفروشة بورق الكاب كيك . أهم حاجة متمليش فتحة الكاب كيك كلها بالعجينة علشان بتنفش لما تدخل الفرن ، كفاية 3/2 منها . بمعلقة عدي علي سطح العجينة بتاعة كل كاب كيك علشان تخليها ناعمة .

  • دخلي الفرن

قبل ما تبدأي في الكاب كيك ، سخني الفرن على درجة عالية و لما يسخن دخلي العجينة الفرن .و لما تخرجي الكاب كيك من الفرن ، سيبيها تبرد لمده 5 دقايق . بعد كده طلعيهم من الصواني يبردوا.

  • إعملي الفروستنج

إضربي الكريم جانتيه بفنجان لبن و بعد كده ضيفي الزبدة و إضربي تاني لحد ما يبقي قوامهم ناعم . ضيفي السكر المطحون و الفانيلا و إضربي تاني كويس جداً. دخلي الفروستنج الفريزر يجمد بالدرجة اللي تحبيها.

  • زيني و قدمي

زيني الكاب كيك بالفروستنج و قدميها مع مشروب سخن مناسب لجو الخريف و إستمتعوا بكاب كيك القرع العسلي بالكريمة .

  • نصائــــح

المقادير دي هتعملك حوالي 12 كاب كيك ، لو حبيتي تعملي عدد أكبر زودي المقادير .