البطاطس أسهل و أخف أكلة، ممكن تعمليها وجبة لوحدها أو جنب أي لحوم ، فراخ أو أسماك ، و علشان عاوزين ننوع سفرتك و نخليكي دايما بتقدمي أفكار جديدة ، هنقدملك النهاردة قالب البطاطس المهروسة في الفرن ، طبق شكله لوحده يفتح النفس ، و كمان علشان هيتسوي في الفرن هيكون مقرمش من برة و هش من جوة ،و فكرة حلوة قوي للرحلات . أحلي حاجة في الوصفة دي إنك ممكن تحتفظي بيها في الفريزر و تخرجيها وقت اللزوم ، يلا بينا نشوف هنعمل طبق قالب البطاطس المهروسة في الفرن النهاردة إزاي .

3 حبات بطاطس كبيرة ، 2 بيضة ، 2 معلقة كبيرة بصل مقطع صغير ، معلقة صغيرة ملح ، معلقة صغيرة فلفل إسود ، فنجان لانشون مقطع ، 2 معلقة كبيرة زبدة ، معلقة كبيرة لبن ، 2 معلقة كبيرة ثوم مقطع ، 2 معلقة كبيرة بقسماط مطحون ، بقدونس مفروم.

نضفي البطاطس كويس و اسلقيها في ميه و ملح و لما تبرد قشريها و إهرسيها في طبق . دلوقتي حطي البصل في طاسة مع الزبدة علي النار و قلبيه لحد ما يصفر.

في طبق كبير ضيفي كل المكونات البطاطس المهروسة ، البصل ، اللانشون ، الملح ، الفلفل الإسود ، الثوم ، البيض ،اللبن ، و اخلطي كويس لحد كل المكونات ما تتجانس مع بعض .

دلوقتي جيه وقت تشكيل قالب البطاطس المهروسة في الفرن ، في صينية الفرن حطي شوية بقسماط و خدي جزء من الخليط و شكليه علي شكل كب كيك ( ممكن تستخدمي إيدك أو بأي وسيلة عندك للتشكيل) و حطيه فوق البقسماط اللي في الصينية و فوقها رشي شوية بقسماط كمان ، و كرري ده مع بقية الخليط لحد ما يتكون عندك صينية كلها قوالب بطاطس علي شكل كب كيك .

سخني الفرن لدرجة حرارة متوسطة و حطي فيه الصينية و هتاخد وقت حوالي 10 دقايق لحد ما تتحول للون الذهبي الجميل .

دلوقتي خرجي البطاطس من الصينية ، و حطيها في طبق التقديم و زينيها بالبقدونس المفروم .

سخني الفرن قبل ما تحطي الصينية علشان البطاطس تطلع لونها وردي و هشة من جوة .
ممكن تستغني عن اللانشون و تكتفي ببقية المكونات .
علشان تزودي القيمة الغذائية ممكن تضيفي جزر مبشور و بقدونس و مشروم في الخلطة .
ممكن تضيفي الجبنة الشيدر المبشورة أو الجبنة الموتزاريلا علي سطح قالب البطاطس المهروسة في الفرن ، تديها شكل و طعم أجمل .
ممكن تستمتعي بطعم البطاطس من غير اي إضافات أو تاكليها بكاتشاب ، مايونيز ، أو مسترده.
ممكن تاكلي البطاطس كفطار أو عشا أو كطبق جانبي على الغدا.