لو زهقتي من المحشي ، الملوخية ، المسقعة ، و الأكل التقليدي بشكل عام ، الوصفة دي ليكي . النهاردة هنفكر برة الصندوق ، هنروح أسبانيا نجيب وصفة سهلة من هناك و مكوناتها موجودة في كل مكان و نرجع نعملها في مطبخنا الجميل ، في مصر . حلاوة الطبق ده زي ما قولنا ، مكوناته سهلة و موجودة في مصر ، و كمان غالباً في مطبخك . من الحاجات الحلوة التانية في الوصفة دي إنها كمان هتتعمل في طاسة واحدة ، يعني مش هتتعبي في غسيل مواعين كتير . الطبق جديد، متكامل ، مغذي و أكيد هيعجب عيلتك . اضبطي ساعتك على نص ساعة (5 دقايق بس تحضير و 25 دقيقة في السوي ) و يلا بينا نبدأ نعمل طبق الفراخ و الرز علي الطريقة الأسبانية .

4 قطع دجاج فيليه ، 3 معالق زيت ، فنجان رز ، 2 فنجان شوربة ، ليمونة ، فنجان بقدونس او كزبرة مقطعة .

2 معلقة صغيرة بابريكا ، معلقة صغيرة ثوم بودر ، معلقة صغيرة ملح ، معلقة صغيرة كمون ، معلقة شطة (حسب الرغبة ) ، معلقة صغيرة بهارات ، معلقة صغيرة كزبرة جافة .

في طبق صغير حطي كل مكونات التتبيلة ( بابريكا ، ثوم بودر ، ملح ، كمون ، شطة ، بهارات ، كزبرة جافة ) و قلبي كويس و بعدين قسمي التتبيلة نصين .

إغسلي الفراخ كويس و إدهنيها بمعلقة زيت و بعد كده بنص التتبيلة اللي جهزناها تبيلها من الناحيتين .

في طاسة مدهونة بمعلقة زيت ، و علي نار هادية قلبي الفراخ من الناحيتين لمدة 3 دقايق و لحد ما تتحمر و يبقي لونها ذهبي ، و بعدين شيلي الفراخ في طبق علي جنب (خلي بالك الفراخ لسه مستوتش و محتاجة تكمل سوي بعدين).

إغسلي الرز و حطيه في الطاسة و ضيفي معاه الشوربة و عصير نص ليمونة و نص التتبيلة اللي عملناها قبل كده ( في الخطوة 2 ) ، و بعدين رجعي الفراخ تاني للطاسة ، و غطيها لمدة 20 ل 25 دقيقة ، لحد ما الفراخ و الرز يستوي .

إغرفي طبق الفراخ و الرز علي الطريقة الأسبانية ، و زوقيه بنص الليمونة الباقية (خليها علي شكل حلقات ) و حطي علي الوش البقدونس أو الكزبرة المقطعة . دلوقتي طبقك جاهز ، ممكن تشغلي شوية من الأغاني الأسباني اللي كتير مننا بيحبها و تستمتعي بجو أسباني مختلف مع عيلتك و تكسري الروتين ، و بالهنا و الشفا .

ممكن تزوقي الطبق بالخضار السوتيه أو الجزر المبشور علي الوش