لو جاية من الشغل متأخرة و معندكيش غير نص ساعة بس علشان تحضري الأكل ، أو لو جالك ضيوف علي غفلة و محتاجة حاجة وصفة أكلة تعمليها بسرعة ، مفيش قدامك غير صدور الفراخ بالجبنة الموتزاريلا و صوص البيستو الأخضر ، طبق النهاردة مش هياخد منك غير 5 دقايق بس تحضير و 25 دقيقة في الفرن تكوني حمرتي فيها بطاطس أو تعملي مكرونة بالصلصة و سلطة ، و بكده يكون عندك وجبة متكاملة ، يلا مع بعض نعمل طبق النهاردة في خطوات بسيطة .

  • جهزي المقادير

4 قطع صدور فراخ ، 2 حبة طماطم مقطعة شرايح ، فنجان جبنة موتزاريلا ، معلقة صغيرة ملح ، معلقة صغيرة فلفل إسود ، فنجان دقيق ، معلقة زبدة .

  • جهزي مقادير صوص البيستو

صوص البيستو من الحاجات المعروفة جداً اللي كتير مننا بيستمتع بطعمها في المطاعم . اللي متعرفيهوش إن صوص البيستو سهل و مكوناته بسيطة جداً . يلا نحضر المقادير مع بعض

½ فنجان زيت زيتون ، راس ثوم مبشور ، 3 فنجان ريحان مفروم و مجفف ، ½ معلقة ملح ، ½ معلقة فلفل إسود ، ½ فنجان صنوبر .

  • إعملي صوص البيستو

إخلطي كل مقادير صوص البيستو في الخلاط لحد ما يتكون خليط قوامه شبه سائل ، دلوقتي عندنا كمية من صوص البيستو الأخضر ، ممكن تستعمليها في طبق صدور الفراخ بالجبنة الموتزاريلا و تحتفظي بالباقي في برطمان في الثلاجة تستعمليه في أكلات كتيرة زي المكرونة و البطاطس تديها طعم و لون أحلي .

  • جهزي صدور الفراخ

إدعكي صدور الفراخ بالدقيق و إغسليها بالميه ، و بعدين تبليها بالملح و الفلفل الإسود .

  • رصي الفراخ في الصينية

رصي صدور الفراخ في طاجن فرن مدهون بمعلقة زبدة ، حطي فوق كل قطعة فراخ معلقة من صوص البيستو الأخضر و بعدين شريحة طماطم و أخيرا طبقة جبنة موتزاريلا .

  • سوي صدور الفراخ

حطي طاجن صدور الفراخ بالجبنة الموتزاريلا و صوص البيستو الأخضر في فرن متوسط الحرارة ، هياخد حوالي 25 دقيقة .

  • قدمي الطبق و استمتعي

خرجي الطاجن من الفرن و حطي صدور الفراخ في طبق التقديم و زوقيه بأوراق الريحان الخضرا .

  • نصائــــح

ممكن بعد ما الفراخ تستوي ، تشغلي الشواية من فوق علشان الجبنة تسيح و تدي شكل أجمل .
و أنتي بتعملي صوص البيستو ممكن تستبدلي الصنوبر باللوز المحمص أو تستغني عنهم لو مش متوفرين عندك ، الريحان و زيت الزيتون و الثوم هيعملك صوص البيستو اللي هيدي لأكلك طعم و شكل أحلي بكتير .
لو عاوزة تدي طعم أحلي لصوص البيستو و قيمة غذائية أكبر ممكن تضيفي للمكونات كاجو و جبنة بارميزان .
ممكن تعملي مكرونة بصوص البيستو جنب طبق صدور الفراخ بالجبنة الموتزاريلا و صوص البيستو و تبقي الوجبة متناسقة مع بعض .