الكيت كات من أحلى أنواع الشوكولاتة اللي موجودة في السوق تقريباً . بس مع زيادة الأسعار ، سعر شوكولاتة الكيت كات بقي عالي مقارنة بحجم الشوكولاته . لو انتي و عيلتك من محبي الشوكولاته الكيت كات و بتاكلوها أكتر من مره في الاسبوع ، يبقي الوصفة النهارده ليكي . هنتعلم نعمل الشوكولاته الكيت كات في البيت .صحيح هتكلفك شوية بس أكيد أرخص من لو اشترتيها من بره و كمان أضمن لصحتك و صحة عيلتك . لو محتاجة سناك حلوة و سهلة و لذيذة بين الوجبات أو سناك للانشبوكس بتاعك إنتي و جوزك و أولادك ، قوالب الشوكولاتة كيت كات في البيت هي الحل. يلا بينا نشوف مكونات الشوكولاتة و إزاي نعملها في خطوات بسيطة .

نص فنجان زبدة مقطعة مكعبات ، كوباية سكر بني ، نص كوباية لبن ، 3/1 كوباية سكر أبيض ، 2 كوباية بسكويت مطحون ، علبة بسكويت سادة ، نص كوباية رقائق شوكولاته ، نص كوباية رقائق باتر سكوتش و 3/2 كوباية زبدة فول سوداني .

قبل ما تبدأي إخلطي البسكويت السادة في الفود بروسيسور، و لو معندكيش ممكن تحطي البسكويت في كيس بلاستيك و إستعملي إي حاجة تقيلة علشان تطحني البسكويت ، بعد كده ضيفي الزبدة ، السكر الأبيض ، السكر البني ، اللبن ، و كوبيتين من البسكويت المطحون لمده 5 دقايق على النار مع التقليب .

في صينية مدهونة زبدة ( بالحجم اللي تحبيه ) ، رصي البسكويت السادة من تحت .

إستخدمي نص الخليط اللي عملتيه في الخطوة الأولي و إفرشيه علي البسكويت اللي رصتيه في الصينية .

دلوقتي حطي طبقة جديدة من البسكويت فوق الخليط

هنكرر نفس الموضوع و نستخدم النص التاني من الخليط اللي عملناه

دلوقتي هنضيف أخر طبقة بسكويت و بكده يكون عندنا طبقتين من البسكويت و الخليط .

دلوقتي هنضيف رقائق الباتر سكوتش( متوفرة في السوبر ماركت الكبيرة ، و هي رقائق مصنوعة من الزبدة و السكر البني و زيت جوز الهند و فانيلا ) ، رقائق الشوكولاته ، و زبدة الفول سوداني في طبق و نسيح الخليط ده في الميكرويف .

إفردي خليط الشوكولاته اللي سيحتيه على وش طبقات البسكويت اللي جهزتيها .

دخلي صينية الشوكولاته في التلاجة لمده 3 ساعات أو لحد لما طبقة الشوكولاته تجمد .

طلعي الشوكولاته من التلاجة و قطعيها على شكل قوالب مربعة بالحجم اللي تحبيه و بالهنا و الشفا عليكم أحلي شوكولاتة كيت كات في البيت .

إحفظي الشوكولاته في التلاجة و لو هتشيليها فتره طويلة ممكن تحفظيها في الفريزر