“النهاردة عندنا سمك” ، كلمة بيقابلها إعتراض في بيوت كتيرة ، مش بس من الأطفال ، لأ و كمان من كبار كتير. طيب ما تيجي نغير شوية و نحاول نقدم طبق السمك بشكل مختلف يفتح النفس و يكسر الروتين. النهارده هنتعلم مع بعض نعمل شرايح السلمون بصوص مختلف هتخليكي تاكلي السمك بطريقة جديدة غير القلي و الشوي ،طريقة هتعجب كل أفراد أسرتك و هما بعد كده اللي هيطلبوه منك. طبعاً كلنا عارفين الفوايد الكتير الموجودة في الأسماك. السلمون زي باقي الأسماك فيه فوايد كتير جداً و مليان بالعناصر المفيدة زي البروتين و أحماض أوميغا 3. لو عايزة تكسري روتين اللحمة و الفراخ و تعملي حاجة جديدة و مختلفة و كمان مغذية ، جربي الطبق ده. يلا مع بعض نشوف المكونات و نحضر الطبق.

  • جهزي المقادير

6 قطع من السلمون الفيليه ( مخلي من الشوك و الجلد ) ، معلقة صغيرة ملح ، معلقة صغيرة فلفل إسود ، 2 معلقة كبيرة زيت زيتون ، 2 فص ثوم مبشور ، 2 معلقة كبيرة عصير ليمون ، ½ معلقة كبيرة عسل أبيض ، 3 معلقة كبيرة زبدة ، معلقة صغيرة زبدة ، 2 معلقة كبيرة بقدونس ، ليمونة مقطعة شرايح ، خل

  • جهزي السمك

إغسلي شرايح السلمون كويس أوي بالدقيق و بعدين إغسليه بالخل و الميه علشان يكون نضيف و جاهز للطبخ.

  • إعملي الصوص

في طاسة علي النار ، حطي معلقة صغيرة زبدة و ضيفي الثوم المبشور و قلبي لحد ما يصفر و ريحته تظهر. ضيفي عصير الليمون و سبيهم علي النار حوالي 3 دقايق ، ضيفي بعد كده 3 معالق كبيرة زبدة و العسل الأبيض و إرفعي الصوص من علي النار و سيبيه علي جنب و بكده يكون الصوص خلص و جاهز.

  • تبلي السلمون

نشفي شرايح السلمون كويس أوي من الناحيتين و تبليها بالملح و الفلفل الإسود .

  •  سوي السمك

حضري طاسة فيها زيت الزيتون علي النار و حطي فيها شرايح السلمون و قلبي علي كل ناحية تقريباً لمده أربع دقايق .

  •  زوقي ، قدمي و استمتعي

خرجي السمك علي طبق التقديم و صبي عليه صوص الثوم و العسل و الزبدة و عصير الليمون اللي جهزتيه في الخطوة 3، زوقي الطبق بالبقدونس المقطع و شرايح الليمون . قدمي الطبق لعيلتك و شوفي النتيجة.

  • نصائــــح

علشان تكون النتيجة رائعة مينفعش تخرجي شرايح السلمون متجمدة و تبدأي الشغل ، لازم تكون في درجة حرارة المطبخ.
لو سمك السلمون مش متوفر ممكن تنفذي نفس الخطوات مع شرايح السمك البلطي أو البوري ، المهم تكون الشرايخ خالية من الجلد و الشوك .
ممكن تقدمي طبق شرايح السلمون مع الرز الأحمر و سلطة خضرا ، طحينة أو بابا غنوج ، و بكده تكون وجبة متكاملة بكل العناصر الغذائية.