هنعمل النهاردة طبق سلطة بألوان الربيع . طبق يفتح النفس ، كله ألوان و قيمته الغذائية مش ممكن تتصوريها ، ممكن تعمليه علي الغداء جنب طبق رئيسي أو في العشاء لوحده أو تاخديه في اللانش بوكس ليكي أو لأي حد في عيلتك يشبعك طول النهار، طبق سلطة الفاصوليا الحمراء بصدورالفراخ والمايونيز ، طبق سهل و مش هياخد منك أكتر من 15 دقيقة ، يلا بينا نشوف المكونات و نبدأ الخطوات .

2 قطعة صدور فراخ كبيرة ، معلقة كبيرة زيت زيتون ، 2 معلقة صغيرة كمون ، معلقة صغيرة شطة (حسب الرغبة ) ، معلقة صغيرة ملح ، فنجان كابوتشي أو خس مقطع قطع صغيرة ، فنجان فلفل ألوان أصفر مقطع مكعبات صغيرة ، فنجان طماطم مقطع مكعبات صغيرة ، فنجان أفوكادو مقطع ، فنجان فاصوليا حمراء ، فنجان بصل أخضر مقطع ، فنجان ذرة حلوة مسلوقة ، 2 معلقة مايونيز ، ½ معلقة صغيرة فلفل إسود ، معلقة صغيرة ملح .

إغسلي قطع الفراخ كويس و تبليها ب ½ معلقة ملح و ½ معلقة فلفل إسود و ½ معلقة كمون و ½ معلقة شطة .

في طاسة فيها معلقة كبيرة زيت زيتون قلبي قطع الفراخ المتبلة علي نار عالية لمدة دقيقتين علي كل وش ، و بعدين هدي النار و سيبي قطع الفراخ تستوي لمدة 15 دقيقة .

إنقعي الفاصوليا الحمراء لمدة ساعتين و اسلقيها و صفيها من الميه و حطيها في طبق .

في طبق كبير حطي الطماطم ، الكابوتشي أو الخس ، الفلفل الأصفر ، البصل الأخضر ، الذرة الحلوة المسلوقة ، الفاصوليا الحمراء المسلوقة ، الأفوكادو .

قطعي قطع الفراخ شرايح طولية أو مكعبات (حسب رغبتك ) و ضيفيها لمكونات السلطة و قلبي كويس لحد ما تختلط جميع المكونات مع بعض .

تبلي السلطة بنص معلقة صغيرة ملح و معلقة و نص صغيرة كمون و نص معلقة صغيرة شطة ، زوقي السلطة بصوص المايونيز بشكل جميل زي الصورة ، و دلوقتي ممكن تتمتعي بأحلي سلطة .

الكمية تكفي 4 أفراد ممكن تغيري المقادير حسب عدد الأفراد .
لو الأفوكادو مش متوفر ممكن تستغني عنه و لكن ننصحك تضيفيه للسلطة بتاعتك بسبب قيمته الغذائية الكبيرة جداً.
إتأكدي إنك صفيتي الفاصوليا الحمراء و الذرة الحلوة المسلوقة كويس قوي من الميه قبل ما تضيفيها للسلطة .
ممكن تستبدلي الفاصوليا الحمراء بالفاصوليا البيضاء و متخليش حاجة تمنعك من إنك تتمتعي بسلطة الفاصوليا الحمراء بصدور الفراخ والمايونيز .