مفيش أحلي من طبق صحي و مغذي و كمان لذيذ و سريع ، طبق سلطة يشبع لوحده مش محتاج أي حاجة جنبه ، سلطة الستيك المشوي ممكن تقدميها لوحدها أو مع بطاطس محمرة ، رز ، أو مكرونة ، و لو كنتي بتعملي ريجيم هتكون سلطة الستيك المشوي حل مثالي للغذاء أو العشاء ، طبق كله فيتامينات و بروتين و مفيهوش سعرات حرارية عالية ، و كمان طبق النهاردة هيكون أجمل طبق سلطة ممكن تقدميه في العزومات و الحفلات ، يلا بينا نبدأ مع بعض الخطوات .

  • جهزي مقادير سلطة الستيك المشوي

4 قطعة إستيك ، 2 فلفل ألوان وسط أحمر مقطع شرايح ، 2 فلفل ألوان وسط أصفر مقطع شرايح ، فنجان ذرة حلوة مسلوقة ، فنجان بصل أخضر مقطع ، فنجان خس مقطع أو كابوتشي ، 4 طماطم شيري مقطعة نصين ، ربع ثمرة أفوكادو مقطعة شرايح .

  • جهزي مقادير الصوص

3 معالق صغيرة عصير ليمون ، 2 معلقة كبيرة كزبرة خضرة مقطعة ، معلقة كبيرة زيت زيتون ، معلقة كبيرة ميه ، 2 معلقة صغيرة عسل ، فص ثوم مبشور ، نص معلقة صغيرة شطة ( حسب الرغبة ) ، ربع معلقة ملح ، ربع معلقة كمون .

  • حضري صوص سلطة الستيك المشوي

في الفود بروسيسور إضربي كل مكونات الصوص (عصير ليمون ، كزبرة ، زيت زيتون ، ميه ، عسل ، ثوم ، شطة ، ملح ، كمون ) لحد ما يختلطوا ببعض كويس أوي ، و بعد كده قسمي الصوص نصين .

  • جهزي الستيك

إغسلي الستيك كويس و صفيه من الميه ، و في طبق عميق حطي الستيك و الفلفل الألوان و نص الصوص اللي حضرتيه من الخطوة اللي فاتت ، و سيبيهم في الثلاجة نص ساعة .

  • إشوي الستيك

دلوقتي إشوي الستيك بعد ما تخرجيه من الثلاجة علي الشواية الكهربائية أو شواية البوتوجاز ، و في آخر وقت حطي الفلفل الألوان علي الشواية لمدة 5 دقايق .

  • جهزي سلطة الستيك المشوي

في طبق التقديم حطي الستيك المشوي ، الفلفل المشوي ، الذرة المسلوقة ، الخس أو الكابوتشي ، الطماطم الشيري ، الأفوكادو ، البصل الأخضر ، و صبي نص الصوص اللي جهزناه قبل كده علي السطح ، و اتمتعي بأحلي طعم لسلطة الستيك المشوي .

  • نصائــــح

ممكن تستغني عن الأفوكادو لو مش متوفر عندك .
طبعا الطماطم الشيري ممكن تستبدليها بطماطم عادية .
لو معندكيش شواية ممكن تتصرفي، و تشوحي الستيك علي النار و تحطي شوية ميه صغيرين عليه لحد ما يستوي ، و متخليش حاجة تمنعك إنك تتمتعي بسلطة الستيك المشوي .
إدهني الشواية بالزيت علشان اللحمة متلزقش فيها .
مدة الشوي بتعتمد على سمك شريحة الستيك . أهم حاجة إنك تركزي معاها علشان متنشفش .