لو عندك لحمة مفرومة و ناوية تعملي كفتة في الفرن أو حواوشي ، إستني شوية و شوفي معانا الطريقة ده ، طبق جديد و مختلف و هياخد نفس وقت طبق الكفتة تقريبا و شكله جميل علي السفرة ، و ليه لا و أنتي بتقدمي شرايح لحمة و جواها الجبنة و السبانخ يعني طبق كله ألوان ، و خصوصا لو حبيتي تبدعي كمان و تقدميه في طبق شيك و حواليه فلفل ألوان و بقدونس . خلاص مش محتاجة تفكري و تسألي كتير عن طرق جديدة لتقديم اللحمة المفرومة ، إحنا هنساعدك . يلا مع بعض نعمل طبق رول اللحم المفروم بأوراق السبانخ الخضراء و الجبنة الشيدر في الفرن .

  • جهزي المقادير

½ كيلو لحمة مفرومة ، 2 فص ثوم مبشور ، ½ معلقة كبيرة بقدونس ، بيضة ، ½ فنجان بقسماط مطحون ، معلقة ملح صغيرة ، معلقة فلفل إسود صغيرة ، فنجان أوراق سبانخ ، فنجان جبنة شيدر ، فنجان بصل مبشور .

  •  إخلطي اللحمة المفرومة ببقية المكونات

في طبق عميق إخلطي اللحمة المفرومة مع الثوم المبشور و البصل و البقدونس و البيضة و البقسماط المطحون و الملح و الفلفل الإسود ، إدعكي بإيدك كويس قوي لحد ما تختلط كل المكونات ببعض .

  • جهزي ورق فويل

حطي ورقة فويل علي رخامة المطبخ و إدهنيها بالزبدة و حطي فيها اللحمة المفرومة اللي جهزتيها في الخطوة 2 ، و خلي اللحمة تاخد شكل مستطيل .

  • حطي الحشو

بعد ما عملتي اللحمة علي شكل مستطيل وزعي عليها أوراق السبانخ و الجبنة الشيدر و لفي اللحمة المفرومة علي شكل رول و إقفلي كويس ورق الفويل من الناحيتين .

  • سوي رول اللحمة المفرومة

حطي رول اللحمة المفرومة و هي ملفوفة بالورق الفويل في صينية فرن و حطيها في فرن متوسط الحرارة ، و بعد حوالي 40 دقيقة إفتحي ورق الفويل و سيبي الصينية 20 دقيقة علشان الوش ياخد لون وردي جميل .

  • زيني و قدمي

بعد ما رول اللحمة المفرومة يستوي حطيه علي طبق التقديم و قطعيه شرايح بشكل جميل و زيني الطبق بالبقدونس .

  • نصائــــح

لو حبيتي طعم أجمل ممكن تضيفي ½ فنجان صويا صوص و ½ فنجان صوص الباربيكيو و تسقي بيهم رول اللحمة المفرومة بعد ما تفتحي ورق الفويل ، و ده هيديها طراوة و طعامة .
لو عاوزة تزودي الألوان في الطبق ممكن تقطعي فلفل ألوان مكعبات و تحطيه مع الجبنة و أوراق السبانخ فوق اللحمة المفرومة قبل ما تلفيها .
ممكن تستبدلي الجبنة الشيدر بجبنة موتزاريلا أو جبنة بارميزان حسب رغبتك أو اللي متوفر عندك في البيت .
لو عاوزة تكملي القيمة الغذائية إعملي بطاطس محمرة أو مكرونة و إتمتعي برول اللحمة المفرومة بأوراق السبانخ الخضراء و الجبنة الشيدر في الفرن .