زهقتي من كل يوم نفس الفطار فول ، طعمية ، بيض ، جبنة ، و خصوصا في الويك إند لما تتجمع العيلة كلها ، طيب إيه رايك لو تفاجئيهم بفطار مختلف شكلا و طعما ، و كمان لو حطيتي جنبه عصير أو نسكافيه مش هتصوري سعادتهم هتكون إزاي ، طبق النهاردة هو رول الفرنش توست بالسيرب . الطبق سهل و بسيط ، مش هياخد اكتر من 15 دقيقة ، و أجمل حاجة في طبق النهاردة إنه مش بس ينفع فطار لكن كمان عشاء أو طبق حلو لو جالك ضيف علي غفلة و معندكيش حاجة تقدميها ، يلا مع بعض نبدأ في خطوات بسيطة رول الفرنش توست بالسيرب .

  •  جهزي المقادير

3 معالق كبيرة زبدة سايحة ، 3 معالق كبيرة سكر ، 2 معلقة كبيرة سكر بني ، معلقة كبيرة قرفة ، 2 بيضة كبيرة ، ¼ فنجان لبن ، 8 قطع توست ، سيرب أو عسل .

  • مقادير إضافية

2 معلقة كبيرة سكر ، 2 معلقة صغيرة قرفة ، 3 معالق كبيرة زبدة .

  •  جهزي التوست

شيلي الحواف الناشفة من التوست علشان يبقي جاهز للف و ميتقطعش منك .

  • جهزي خليط الزبدة

في طبق ضيفي 3 معالق زبدة سايحة و 3 معالق سكر و 2 معلقة سكر بني و معلقة قرفة و إمزجيهم مع بعض كويس قوي و إركني الخليط دلوقتي لحد ما تستعمليه .

  • إخلطي البيض و اللبن

في طبق تاني ، إمزجي كويس 2 بيضة كبيرة مع ربع فنجان لبن .

  • إخلطي السكر و القرفة

في طبق ثالث إخلطي 2 معلقة كبيرة سكر و 2 معلقة صغيرة قرفة .

  • لفي التوست

بعد ما شيلتي الحواف من قطعة التوست إدهنيها بخليط الزبدة و لفيها علي شكل رول ، كرري ده مع كل قطع التوست .

  • إستعملي مزيج اللبن و البيض

بعد ما لفيتي رول الفرنش توست إغمسي كل واحدة في خليط اللبن و البيض و حطيها في طبق علشان نبدأ الخطوة 8

  • إقلي رول الفرنش توست

حطي 3 معالق زبدة في طاسة و خليها تسيح و بعدين نزلي فيها رول الفرنش توست و قلبيها علي الجانبين لحد ما تتحول للون الذهبي.

  • قدمي و استمتعي

بعد ما تخرجي رول الفرنش توست حطيها في طبق التقديم و رشي عليها خليط السكر و القرفة اللي جهزتيها في الخطوة 5 ، و بعدين ممكن تحطي عليها السيرب أو العسل حسب رغبتك و استمتعي برول الفرنش توست بالسيرب .

  • نصائــــح

ممكن تقدمي رول الفرنش توست مع صوص الشوكولاتة أو النيوتلا بدل السيرب أو العسل .
علشان تزودي الطعم و القيمة الغذائية ممكن تقطعي شرايح موز أو أي فاكهة تحبيها مع رول الفرنش توست بالسيرب.