الميلك شيك من الحاجات اللي ناس كتير أوي بتحبها و بتطلبها في الكافيهات بسعر عالي ، بس مش ناس كتير بتعرف تعملها مع إن الطريقة سهلة جداً . النهارده هنتعلم نعمل الميلك شيك . مش بس هنعمله بطريقة طعمها حلو ، لأ هنعمله بشكل جميل كمان و هي على طريقة ألوان الجلاكسي الشهيرة أو ألوان الفضاء. وصفة النهاردة مغذية لأن فيها لبن و فكرة حلوة ممكن تبهري بيها أطفالك و تقنعيهم بيها يشربوا اللبن من غير خناق ، و كمان صنف حلو و لذيذ تقدميه لضيوفك في الصيف و تظهري فيه إبداعاتك . بس ده مش كل اللي هنقدمهولك النهارده ، كمان هنعرفك طريقة المارشميلو المشوي ، اللي هو من أحلي الحاجات اللي ممكن تقدميها مع الميلك شيك. يلا بينا نبدأ وصفات النهارده .

  • جهزي مقادير الجلاكسي ميلك شيك

2 و نص كوباية آيس كريم فانيلا ، كوباية لبن ، ألوان طعام صحية بينك ، ألوان طعام صحية أزرق ، ألوان طعام صحية موف ، كريمة خفق ، سبرنكلز (يفضل ألوان بينك و أزرق و موف ) .

  •  جهزي مقادير المارشميلو

كيس مارشميلو و عصيان خشب ( بتاعة الشيش طاووك )

  • جهزي الخليط

قسمي الآيس كريم و اللبن على 3 كميات متساوية. هتبدأي بضرب المجموعة الأولي من اللبن و الآيس كريم في الخلاط مع اللون البينك ، و هتضربي المجموعة التانية مع اللون الأزرق ، و هتضربي المجموعة التالتة مع اللون الموف. بكده هيكون عندك 3 ألوان من خليط اللبن و الفانيلا و دول اللي هنشتغل بيهم .

  • قدمي و اتمتعي

هتحتاجي كوباية طويلة و شفافة علشان تظهر طبقات الألوان اللي عملناها . إبدأي ضيفي طبقات الألوان في الكوباية بالترتيب ، اللون البينك ، اللون الأزرق ، اللون الموف ، أو بأي ترتيب تاني يعجبك ، المهم إنك توصلي في الآخر لشكل الجلاكسي المشهور ، أهم حاجة بعد ما تجهزي جلاكسي ميلك شيك بألوانه الحلوة في الكوباية ترشي على الوش كريمة و تضيفي السبرنكلز .

  • إشوي المارشميلو

من أحلي الحاجات اللي ممكن تقدميها مع الميلك شيك هيا المارشميلو المشوي. لو مجربتيش المارشميلو المشوي قبل كده يبقي فايتك كتير ولازم تجربيه في أسرع وقت . طيب إزاي تعملي المارشميلو المشوي ؟ دخلي كل واحدة من المارشميلو في عصاية من عصيان الشيش طاووك. شغلي نار البوتجاز و قلبي المارشميلو عليها براحة ( من غير ما تلمس النار أكيد ) لحد لما لونه يتحول بني فاتح .

  • نصائــــح

ممكن تقللي كمية اللبن لتلات أربع كوباية بدل كوباية كاملة. ده بيعتمد على الشكل اللي تحبي الميلك شيك يظهر بيه. اللبن الكتير هيعملك شكل دواير بتدخل في بعضها إنما اللبن القليل هيخلي الخليط تقيل و هيظهر الكوباية مقسمة 3 ألوان من غير ما لون يدخل على التاني. إنت