حد يقدر يقاوم الموز و طعامته ؟ مش ممكن ، طيب إيه رأيك لو الموز ده كمان بقي في تورتة لذيذة ، أكيد الإغراء هيزيد ، تابعينا علشان تعرفي تعملي أسهل و أسرع تورتة مش هتحتاج منك تشغلي الفرن أو تخافي عليها تهبط ، ممكن تعمليها في أعياد الميلاد أو تاخديها هدية لأصحابك ، و طبعا علشان هتكون من صنع إيديكي هتبقي اجمل و اطعم بكتير من اي حاجة جاهزة .

  • جهزي المقادير

4 باكو بسكويت سادة ، 2 معلقة زبدة سايحة ، 3 أكياس كريم جانتيه ، 3 فنجان لبن ، 4 حبات موز ، مارشميلو ، كريز ، سبرنكلز ، مكسرات

  • إطحني البسكويت

إطحني البسكويت و خليه ناعم جدا ، بعد كده ضيفي 2 معلقة زبدة سايحة و قلبي كويس قوي لحد ما البسكويت يتشرب من الزبدة و يتحول لعجينة .

  • جهزي قاعدة التورتة

دلوقتي إفردي العجينة في قالب التقديم علشان تكون قاعدة التورتة اللي هتحطي عليها بقية المكونات ، حطي القالب في التلاجة لمدة ساعة .

  • حضري الكريم جانتيه

حطي 3 أكياس كريم جانتيه في طبق و ضيفي عليهم 3 فنجان لبن بارد و إضربي بالمضرب لحد ما الكريم جانتيه يجمد ( هتلاقي علي عبوة الكريم جانتيه الطريقة) ، و بعدين حطيه في الثلاجة ساعة علشان يتجمد شوية و تعرفي تشكليه كويس .

  • ضيفي الكريم جانتيه

بعد ما تخرجي البسكويت و الكريم جانتيه من التلاجة ، حطي طبقة من الكريم جانتيه علي طبقة البسكويت و غطيه كله .

  • قطعي الموز

قطعي الموز شرايح رفيعة و حطيها فوق طبقة الكريم جانتيه

  • زوقي الطبق

حطي طبقة تانية من الكريم جانتيه فوق الموز ، و دلوقتي إبدأي في تزويق الطبق بالمارشميلو و السبرنكلز و الكريز و المكسرات .

  •  قدمي

دلوقتي ممكن تقطعي التورتة و تحطيها في طبق التقديم و تستمتعي بطعم تورتة رائع .

  • نصائــــح

مش لازم ترتبطي بطريقة تزويق واحدة للتورتة ، لو الكريز و المارشميلو و السبرنكلز و المكسرات من الحاجات اللي مش متوفرة أو غالية ، ممكن تزوقي التورتة بالفراولة والشوكولاتة المبشورة أو بماكينة تزويق التورتة تعملي وردات بالكريم جانتيه و تحطي علي وش التورتة قطع
ممكن تقدمي التورتة بشكل مختلف ، نفذي نفس الخطوات و لكن وزعي المقادير في كاسات جيلي و الحل ده هيكون عملي و شيك لو عندك ضيوف .
لو تحبي ممكن تستبدلي البسكويت المطحون بقطع البسكويت و رصيها جنب بعض علشان تكون قاعدة التورتة .
ده كلها أفكار و ممكن تغيري و تبدعي بنفس المكونات البسيطة ، موز ، بسكويت ، كريم جانتيه
الطبق ده عملي جدا ممكن تقدميه في الصيف و هيكون أحلي في الشتاء علشان الموز بيكون أطعم و أرخص بكتير .