زي ما عودناكي دايما بنجيبلك أطباق من كل المطابخ العالمية ، النهاردة عندنا طبق ياباني ، بان كيك إسفنجي علي الطريقة اليابانية ، و اليابان معروفة بالكيك الهش الناعم اللي شكله لوحده يفتح النفس ، و طبق النهاردة سهل هتحضريه في 10 دقايق بس ، و هيكون عندك بعدها بان كيك إسفنجي علي الطريقة اليابانية تقدميه لأسرتك مع الشاي على الفطار أو لضيوفك بدل الحلويات الجاهزة ، لأن أكيد الضيف هيحس بحبك و ترحيبك بيه مع الحاجة اللي بتعمليها بإيدك ، يلا مع بعض نعمل بان كيك إسفنجي علي الطريقة اليابانية .

معلقة صغيرة بيكنج بودر ، ¼ معلقة صغيرة فانيلا ، معلقة صغيرة لبن ، 6 معالق صغيرة دقيق ، 2 1/2 ، 3 معالق صغيرة سكر ، 2 بيضة ( إفصلي بياض البيض لوحده و الصفار لوحده ) ، زيت للقلي .

في طبق عميق إخلطي اللبن و البيكنج بودر و الفانيلا و صفار البيض و ضيفي الدقيق و اضربي كويس قوي لحد ما يتحول الخليط للون الأصفر .

في طبق تاني إضربي بياض البيض و السكر كويس جدا بالمضرب لحد ما يتحول لمارنج و ده هياخد من 2 ل 3 دقايق ، و علشان تعرفي إنك وصلتي للشكل المطلوب إضربي لحد ما تقدري تقلبي الطبق و المارنج يفضل في الطبق و ميوقعش منه .

ضيفي ثلث المارنج للخليط اللي عملتيه في الخطوة 2 و قلبي كويس قوي لحد ما يختفي اللون اللون الأبيض و بعدين ضيفي الثلث التاني و التلث الأخير بالتدريج .

جهزي قوالب كاب كيك و حطي فيها ورق زبدة و صبي معلقة من الخليط في كل فتحة ، و انقلي القوالب في طاسة فيها زيت و غطي الصينية لمدة 4 دقايق ، و بعد كده إقلبي البان كيك في نفس القوالب علي الوش التاني لمدة 4 دقايق كمان .

دلوقتي خرجي البان كيك من القوالب و قدميها دافية مع القشدة ، الفواكه ، العسل ، السكر البودرة أو السكر الشربات و استمتعي بأجمل بان كيك علي الطريقة اليابانية .

إتأكدي كويس قوي من نظافة الطبق و المضرب اللي هتضربيفيه بياض البيض و السكر ، علشان وجود أي زيت هيمنع تشكيل المارنج .
ضيفي المارنج حبة حبة للخليط علشان الوصفة تنجح و مينفعش تضيفيه مرة واحدة .
قلبي البان كيك برفق و هي علي النار و لو سطحها طري غطيها بورق الزبدة و قلبي بهدوء .
المقادير اللي فاتت تعمل 4 قوالب بان كيك و لو عاوزة أكتر زودي المقادير حسب عدد الأفراد .