التفاح فاكهة من أجمل الفواكه و جمالها بيزيد لما تتحط في طبق مختلف محدش يقدر يقاوم جماله و طعامته زي فطيرة التفاح ، شرايح التفاح بزبدة الفول السوداني و غيرها كتير . النهارده هندخل التفاح في البارفيه ، بارفيه فطيرة التفاح بالكريم جانتيه . سمعنا كتير عن البارفيه و جماله و سهولته بس ناس كتير مننا لسه مجربتهوش . البارفيه طبق ينفع عشاء أو فطار خفيف أو حاجة حلوة تقدميها لأسرتك و ضيوفك ، في 10 دقايق بس هتحضريها و من غير فرن و في خطوات بسيطة جدا ، النهارده هنشجعك تجربيه . يلا بينا نعرف الطريقة و نحضر المقادير و نبدأ فيها دلوقتي من غير تردد .

4 ثمرة تفاح ، 2 معلقة كبيرة زبدة ، فنجان زبادي ، ½ معلقة صغيرة فانيلا ، كيس كريم جانتيه ، فنجان لبن ، 2 فنجان كوكيز مقطعة قطع صغيرة ، 12 معلقة كبيرة سكر .

قطعي التفاح قطع صغيرة و ضيفي ليه 2 معلقة زبدة .

في طبق صغير إمزجي فنجان زبادي و 6 معالق كبيرة سكر و ½ معلقة صغيرة فانيلا ، و ده هيكون الخليط الأول .

إضربي كيس الكريم جانتيه في فنجان لبن بالمضرب لحد ما تتقل و بعدين ضيفي ال 6 معالق سكر اللي فاضله من المقادير و كملي ضرب لمدة دقيقتين ، و بكده تكوني عملتي الخليط التاني .

ضيفي خليط الزبادي و السكر و الفانيلا لخليط الكريم جانتيه و السكر و قلبي كويس لحد ما يمتزجوا مع بعض .

إبدأي في رص الكاس و حطي معلقتين من الخليط اللي جهزتيه في الخطوة 6 و بعدين طبقة من الكوكيز المقطعة و طبقة من التفاح المقطع و كملي بنفس الترتيب لحد ما تعملي طبقات .

بعد ما رصيتي طبقة كوكيز و طبقة من خليط الكريمة و طبقة من التفاح المقطع ، خلي آخر طبقة من خليط الكريمة و رشي علي السطح شوية كوكيز ، و استمتعي ببارفيه فطيرة التفاح بالكريم جانتيه .

قدمي البارفيه بعد ما تعمليه علي طول علشان الكوكيز تكون كريسبي أو بتقرمش.
ممكن تضيفي المكسرات علي سطح الكاس علشان تديله شكل أحسن و قيمة غذائية أكبر .
لو عندك صوص كراميل ممكن تضيفي معلقة علي السطح .
لو حبيتي تزودي متعة الألون ضيفي مكعبات الفراولة بلونها الأحمر الجميل علي السطح .
ممكن تستبدلي الفانيلا بالقرفة هتدي طعم مميز للبارفيه .
المقادير تكفي 4 كاسات ممكن تزودي أو تنقصي الكمية حسب عدد الأفراد ، و اتمتعي إنتي و كل اللي تحبيه ببارفيه فطيرة التفاح بالكريم جانتيه .