الموز من الفاكهة اللي تقريباً مفيش حد مبيحبهاش، كبار أوصغيرين. الموز مش بس فاكهة ده بطل لوصفات كتير مش ممكن تتصوريها.بيتاكل لوحده، بيتعمل عصير باللبن، بيتاكل مع النوتيلا أو زبدة الفول السوداني، بيتقطع حتي شرايح مع العسل ، بيدخل في عجينة الحلويات زي المافنز و الكابكيك و البان كيك ،و حاجات تاني كتير.هنحاول مع بعض نشوفها كلها على مدار الوصفات الجاية و هنستمتع بطعامته صح. يلا بيندا نبدأ رحلتنا النهارده في عالم الموز و نتعرف إزاي بمقادير بسيطة و طريقة أبسط هيكون عندنا موز مثلج أحلي من الآيس كريم، لأن مكوناته كلها طبيعية ، و ممكن تقدميه لعيلتك في سهرات الصيف و كمان هيكون حاجة حلوة و مميزة لضيوفك ، دلوقتي تعالي نبدأ خطواتنا اللي مش هتاخد منك أكتر من 10 دقايق.

  •  حضري المقادير

4 حبات موز (أوحسب عدد أفراد اسرتك) ، 4 عصيان خشب (عصيان الآيس كريم ) ، مكسرات ، جوز هند ، سبرنكلز ، قالب شوكولاتة .

  •  جهزي الموز

حطي عصيان الأيس كريم في كل موزة بحرص علشان الموزة متتكسرش منك، علشان تكون زي شكل الآيس كريم اللي واخدين عليه ، و بعدين حطي الموزفي الفريزر في علبة و غطيه كويس لمدة ساعة علشان يجمد. متفلفيش لو فتح منك الموز و إنتي بتدخلي عود الخشب لأنك ممكن تضمي كل حبة مع بعض كويس و تلفيها بورق الومنيوم و لما تخرج من الفريزر هتكون الحبة إتجمدت و مسكت مع بعض و تقدري تفكي ورق الألمونيوم و تبدأي الشغل فيها.

  •  سيحي الشوكولاتة

دلوقتي عندك إختيارين ممكن تسيحي الشوكولاتة في الميكروويف ، و ده طريقة سريعة لكن لازم تكوني حريصة علشان لو زودتي فترة التسخين ممكن الشوكولاتة تتحرق ، إبدأي ب30 ثانية و شوفي التأثير و زودي كل مرة 30 ثانية لحد ما تسيحي الشوكولاتة، و الطريقة التانية علي حمام مائي و طريقة الحمام المائي سهلة، كل اللي تعمليه ، إنك تقطعي الشوكولاتة قطع صغيرة ، و تحطيها في حلة صغيرة و تحطي الحلة الصغيرة في حلة كبيرة فيها ميه سخنة و تسبيها من 5 ل 10 دقايق لحد ما تسيح ، و في الحالتين ممكن تضيفي معلقة صغيرة زبدة للشوكولاتة السابحة علشان تدبها طعم و لمعة حلوة .

  • غطي الموز

خرجي الموز من الفريزر و غطبه بالشوكولاتة اللي لسه مسيحاها.

  • زوقي و ابدعي

دلوقتي ممكن تظهري الفن و تزوقي الموز بأي طريقة أو مكونات موجودة عندك ، مكسرات ، سبرنكلز ، جوز هند ، فاكهة مبشورة ، شوكولاتة بييضة أو أي حاجة تاني متوفرة. بعد التزين ، دخلي الموز في الفريز مره كمان علشان الشوكولاته و التزيين يمسك في بعضه زي الأيس كريم. طلعي الموز من الفريزر، قدميه لعيلتك و استمتعوا.

  • نصائــــح

لما تخرجي الموز من الفريزر سيبيه دقيقة يفك قبل التقديم .
مينفعش تسيبي الموز برة الفريزر لأنه دلوقتي زي الأيس كريم لازم يتقدم مثلج .
ممكن كفكرة تانية للتقديم تقطعي الموز شرايح و تنفذي نفس الخطوات و تقدميه في كاس و ممكن يتاكل بالشوكة .