أوقات كتير في الويك إند بتحسي إنك عاوزة تغيري الروتين و تعيشي جو مختلف و تدلعي نفسك و كمان جوزك بأكلة حلوة في مطعم كبير، و لكن بتفوقي علي الحقيقة لما تعرفي إن التجربة هتكلفك إسبوع من التقشف ، وعلشان كلنا بنمر بالحالة ده قررنا النهاردة نقدملك طبق الفراخ المقرمشة بالجبنة البارميزان ، طبق عالمي بيتقدم في أفخم الفنادق ، جربي الفراخ بالطريقة ده ، و علشان تعيشي التجربة كلها قدمي معاها بطاطس شيبسي و كاتشاب و عصير ، ممكن كمان تعملي جو رومانسي بالشموع و الموسيقي الهادية ، و ساعتها هتحسي إنك في مطعم ولكن بتكاليف أقل بكتير و من غير تقشف و إحساس بالذنب .

4 قطع فراخ بانيه ، كوباية بقسماط مطحون ، نص كوباية جبنة بارميزان ، 3 معالق كبيرة بقدونس مفروم ، 3 معالق كبيرة زبدة سايحة , 3 معالق صغيرة عصير ليمون ، ملح ، فلفل إسود ، بهارات ، 2 فص ثوم مفروم .

حطي كل قطعة من الفراخ علي لوحة التقطيع و قطعيها صوابع طويلة و سميكة.

في طبق كبير إخلطي البقسماط المطحون ، البقدونس ، الجبنة البارميزان ، الملح ، الفلفل الإسود ، البهارات .

في طبق تاني إخلطي الزبدة و عصير الليمون و الثوم .

خدي الفراخ اللي قطعتيها صوابع و إغمسي كل واحدة منها في الخليط( الزبدة و عصير الليمون و الثوم )، و متنسيش تقلبيها علي الجانبين علشان تتشرب من الخليط كويس ، و لما تعملي الخطوة مع كل شرايح الفراخ ، إبدأي إغمسي كل شريحة في الخليط التاني (البقسماط و الجبنة البارميزان و البقدونس) ، و قلبي كل شريحة علي الجانبين ، و بكده نكون جهزنا الفراخ و نكون مستعدين للتسوية .

سخني الفرن لدرجة حرارة متوسطة ، رصي قطع الفراخ المتبلة بالبقسماط في صينية و دخليها الفرن، هتاخد تقريبا وقت من 20 ل 25 دقيقة ، لحد ما تستوي من جوة و تبقي مقرمشة من برة .

رصي قطع الفراخ بعد خروجها من الفرن في طبق التقديم و زينيها بشرايح الطماطم و البطاطس الشيبسي ، و إستمتعي بطعم فراخ مقرمشة مش ممكن تنسيها .

قطعي الفراخ علي لوحة تقطيع خاصة بالفراخ و تكون مختلفة عن لوحة تقطيع اللحوم أو الخضار ـ و ده علشان سلامتك
ممكن تقطعي الفراخ مكعبات صغيرة و بكده تاخد شكل الناجتس
الكمية تكفي فردين و ممكن تزودي حسب عدد الأفراد أو الضيوف
لو الجبنة البارميزان مش متوفرة أو غالية بالنسبة ليكي ممكن تستبدليها بالجبنة الموتزاريلا