أكتر ما يحتاج الطفل من أسرته هو أنه يشعر بالحب والاهتمام وجايز دول يبقوا أكتر عاملين ممكن يأثروا علي الطفل وعلي حياته. ومن ضمن اهتمام الأم بطفلها هو اهتمامها أنها تنمي مهاراته وذكاؤه من أول ما يتولد يوم بيوم ولحد ما يكبر. في طرق كتيرة ممكن تنمي بيها ذكاء طفلك حديث الولادة هتلاقيها خطوة بخطوة في المقال ده.

عقل الانسان مبني علي السعي لتحصيل الشعور بالأمان. ولو العقل مش حاسس بالأمان مش هيقدر يتعلم. وعشان تحسسي ابنك بالأمان مهم جدا يبقي في تلامس كتير بين بشرتك وبشرته. المسي ايده ورجله وخده كتير ولو الجو مناسب وممكن يقعد بالحفاضات بس يبقي دي فرصة كويسة أنك تلمسي بطنه وظهره.

الخبراء بيقولوا أن الكلام مع طفلك حديث الولادة مؤثر جدا. احكي يومك لطفلك واتكلمي معاه كتير. الكلام مع طفلك هيساعده يتعلم الكلام بدري وكمان الدرسات أثبتت أن الطفل في عمر ال٣ سنوات والي أهله كانوا بيتكلموا معاه كتير نسبة ذكاؤهم بتبقي أعلي مرة ونص من نفس الأطفال الي في عمرهم، ومع وصولهم لمرحلة الإبتدائية بتبقي مهارات القراءة والإملاء والكتابة قوية عندهم.

الأطفال من سن ٣ ل٤ شهور بيقدروا يميزوا بين تعبيرات الوش المختلفة. العبي مع طفلك لعبة الوشوش المختلفة وغيري تعبيرات وشك كتير. تعبيرات الوش بتعلم الطفل يميز المشاعر المختلفة وبالتالي بتساعده في المستقبل يكون عنده مهارات اجتماعية متقدمة.

من الأساليب الي بتساعد الطفل أنه يتعلم اللغة والكلام أسرع أنه الآم تستخدم صوباعها وتشاور علي الحاجة الي بتتكلم عليها. بوصول الطفل لعمر ٩ شهور بيبتدى يتابع حركة صوابعك ويميز نوعا ما أنتي بتشاوري علي ايه.

حطي ابنك قدام المراية. في البداية الطفل هيفتكر أنه في طفل تاني أدامه لكن مع الوقت هيبدأ يتعلم أنه هو ده شكله. اللعبة دي بتساعد علي تحفيز حاسة الإبصار عند الطفل.

غني لطفلك أغاني من تأليفك أو أغاني الأطفال المشهورة لأن بعض الأبحاث بتشير أنه في علاقة بين تعلم الأغاني والأوزان وبين تعلم الرياضيات في المستقبل.

من الألعاب اللطيفة أنك تشيلي طفل وتوريه كبس النور وتأثيره لما بتدوسي عليه أن مرة بيقفل ومرة بينور ودي وبيعلم الطفل السببية والتأثير .

في كتب مخصصة للأطفال حديثي الولادة والرضع بتكون غي الغالب عبارة عن صور بس. وفي كمان كتب من نوعية الpop up الي بيظهو فيها أشكال تبرز خارج الكتاب. اختاري كتب ملونة مناسبة لسن طفلك وحاولي تقرأي معاه كل يوم.

تجنبي تماما تعرضي طفلك للتلفزيون والشاشات التانية لأضرارهم المعروفة علي عقل الطفل وخصوصا القنوات المخصصة للأطفال الصغيرين الي بتبقي مرتكزة علي أغاني والحان موسيقية مكررة علي مدار اليوم.

أحب ما يمكن أن تقدميه لطفلك أنك تحبيه