من أجمل اللحظات الي بتمر علي الأم لما بتسمع صوت ضحكة طفلها الرضيع. وعشان تعرفي ازاي انتي كمان تخلي طفلك يضحك اتبعي الخطوات التالية:

  •  غيري صوتك

الطفل المولود الجديد بيبقي عنده اهتمام بالأصوات وطبعا بيبقي عارف صوت الأم كويس. حاولي تتكلمي معاه وانتي مغيره صوتك لأصوات تانية أو تعملي أصوات غريبة حواليه.

  •  لعبة الإختفاء

من الألعاب الي بتثير اهتمام الطفل الرضيع لعبة الإختفاء أو الPeekaboo. ببساطة شديدة مجرد إنك تخبي وشك بإيدك وتظهريه تاني ده سبب كافي جدا للطفل أن يضحك! ممكن كمان تستخبي وتظهري كذا مرة ورا بعض هتلاقي الطفل متجاوب وبيضحك علي اللعبة دي لكن حاولي لما تخبي وشك أو تستخبي أنك متخديش وقت طويل قبل ما تظهري تاني كفاية قوي ٤٠-٥٠ ثانية.

  •  لعبة النفخ

دي لعبة لطيفة جدا لدرجة أنه بيطلق عليها بالإنجليزي Blowing Raspberries. في اللعبة دي الأم بتقوم بنفخ هواء بسيط علي بطن المولود مباشرة أو علي صوابع رجليه واللعبة دي بتدي الطفل إحساس لطيف وبتخاليه يضحك بس مهم جدا أنك تاخدي بالك أن بطن طفل متتعرضش لبرد من الهواء.

  •  اضحكي

طفلك عارفك كويس ولو ضحكتي هتلاقيه هو كمان بيضحك. اضحكي جنبه وانتي ماسكه ايده واسمتعتي بصوته ضحكته هو كمان.

  • لعبة الزغزغة

الأطفال الرضع بيحبوا الزغزغة! ممكن تزغزغي طفلك بلطف ولفترة بسيطة في رجله أو خده عن طريق اللمس المتكرر بأطراف الأصابع.

  •  استخدمي قطعة قماش

ممكن تستخدمي قطعة قماش أو فوطة صغيرج أو منديل وتخبي بيه وش الطفل وتحركي المنديل بالراحة علي وشه وبعدين تكشفي وشه فأجأة… دي برضو من الألعاب الي الأطفال الرضع بيحبوها وبتخاليهم يضحكوا لكن خدي بالك أنك نتسيبيش الفوطة أو المنديل علي وش الطفل بشكل يعرضه للإختناق وكمان متسيبيش المنديل جنب الطفل بعد الإنتهاء من اللعب.